Науко да технологийлан лу ий теммым палемдыме кышкарыште Марий Элыште учёный, туныктышо, студент да школышто тунемше-шамычлан XV Науко фестиваль почылтын.
Ончыл учёныйлан – кӱкшӧ награде
Марий кугыжаныш университетыште фестивальым торжественно почмаште республикым вуйлатыше Юрий Зайцевын кӱштымашыже почеш правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов лийын да фестивальым почмо дене саламлен, тудын кӱлешлыкшым палемден.
Тудо регионым вуйлатышын саламлымашыжым лудын. Тушто тыге возымо:
– Тиде событий – Россий президент Владимир Владимирович Путинын самырык тукымым шымлыме пашалан кумылаҥдаш элнан науко да технологий могырым суверенитетшым пеҥгыдемдаш палемдыме задачыжым шукташ кӱлешан ошкыл. Республикын правительствыже самырык тукымлан тунемаш да шымлыме пашам ышташ чыла йӧным ышта. Образованийым пуымо тӧнеж-влак тачысе жаплан келшышын уэмдалтыт, «Кванториум», IT-куб да талантан йоча-влаклан «Волгенче», «Кушмо точко» рӱдер-шамыч пашам ыштат. 2023 ий гыч самырык учёный, шымлызе да инноватор-влаклан Марий Элым вуйлатышын грантшым пеҥгыдемдыме. Тымарте тудым лу еҥлан пуымо. Мемнан самырык тукымын шымлыме пашашт республикым эшеат вияҥдат манын ӱшанем. Тек шымлаш, уым шонен лукташ кумылда эре лиеш.
Саламлымаш деч вара Константин Анатольевич шымлыме пашаште сеҥымашыш шушо-влаклан кӱкшӧ наградым кучыктен. Марий Элым вуйлатышын Тауштымашан серышыж дене тыгай шымлызе , преподаватель, лектор-влак палемдалтыныт: Александр Акшиков (МарНИИЯЛИ), Анна Артамонова (ПГТУ), Вера Белоусова (МОСИ), Андрей Дедов (ПГТУ), Михаил Дубинин (МарГУ), Евгений Кукарев (МарГУ). Игорь Фёдоров (МОСИ), Алексей Вальман («Знание» обществын регионысо пӧлкаже, специальный военный операцийын участникше), Алексей Ошаев (МарГУ).
Тыгак погынышо-влакым фестивальым почмо дене Марий Эл образований да науко министр Лариса Ревуцкая, МарГУ-н ректоржо Михаил Швецов саламленыт да шымлыме пашашке кугу надырым пыштыше-влаклан кӱкшӧ наградым кучыктеныт.
Ты кечын Марий кугыжаныш университетыште «Жап вошт инноваций ончыкылыкыш!» интерактивный ончер почылтын. Тушто шымлыме у проектыш да разработкышт, паша лектышышт дене МарНИИЯЛИ, республикысе вуз-влак, Йошкар-Оласе технологий колледж да йоча усталык рӱдер-влак палдареныт.
«Просветитель пашам умбакыже вияҥдыман»
Науко фестивальым почмо деч ончыч ты кечын Марий кугыжаныш университетыште «Знание» Россий обществын регионысо пӧлкажын эскерыше советшын заседанийже лийын. Тудо республик правильстве председательын алмаштышыже – тӱвыра, савыктыш да калык-влакын пашашт шотышто министр Константин Ивановын вуйлатымыж почеш эртен. Погынышо-влак ӱмашсе пашам иктешленыт да ончыкыжым вияҥме корным палемденыт. Заседанийыште «Знание» Россий обществын Юл кундем федерал округысо регион-влакым вияҥдыме шотышто виктемым вуйлатыше Дмитрий Травкин, республикын образований да науко министрже Лариса Ревуцкая, обществын регионысо пӧлкажын председательже Михаил Швецов лийыныт. Дмитрий Травкин каласен:
– Калыкын кумылын ушнымыжо, тудын ӱшанже – мемнан пашан эн сай показательже. Туге гынат умбакыже вияҥман да просветитель пашанам кумдаҥдыман, тидлан регионысо пӧлка-шамычлан у йӧн пуалтеш. 2024 ий обществын Марий Элысе пӧлкажлан моткоч лектышан лийын. Кугу рольым патриотизм направлениян мероприятий-влакым эртарыме модын. Посна тауштымо мутым республикын регионысо пӧлкажын председательже Михаил Николаевич Швецовлан ойлем.
Заседанийыште палемденыт: Марий Элыште 2024 ийыште «Знание» Россий обществын лекцийжым 16 тӱжем наре еҥ колыштын.
– 16 тӱжем – серьёзный цифр. Тидыже республикыште илыше-влакын просветитель пашалан кумылан улмышт нерген ойла, сандене ты пашам умбакыже кумдаҥден вияҥдыман да шинчымашым налаш утларак йӧным ыштыман, – каласен Константин Иванов.
Погынышо-влаклан Дмитрий Травкин Юл кундем федеральный округышто «Знание» обществын регионысо полкаже-влакын кугыжаныш кучем орган-влак дене вашкылышт нерген каласкален.
Тыгак заседанийыште Марий кугыжаныш университетыште илышыш пурталтше проект-влак шотышто каҥашымаш лийын. Мутлан, студент-влакын «Воксресение» кычалме отрядышт пелен «Самырык лекторын школжо» уло. Тушто 14 спикерым ямдылен лукмо, нуно Кугу Отечественный сарын историйже дене специализироватлалтыт. «Шинчымаш. Герой-влак» проект кышкарыште специальный военный операцийын участникше Алесей Вальманын персональный ончерым погымо.
Тылзе мучко Науко фестиваль кышкарыште республикысе чыла муниципальный образованийыште науко дене кылдалтше изи фестиваль-шамыч эртаралташ тӱҥалыт, нуно чумыр налмаште 4000 утла еҥым авалтат. Тиде республикысе калыкым науко да технологий областьыште у сеҥымаш дене палдараш сай йӧн.
Марий Эл Республикым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
