Кылмен черланымым эмлыме ик эн тӱҥ йоҥылышлан антибиотикым шке семын йӱмым шотлыман.
Эртыше арнян республикысе медицине организацийлашке, кылмен черланымылан вуйым шийын, 3016 еҥ полышым йодын миен. Тиде чот тылеч ончычсо показатель деч 9,6 процентлан кугурак лийын.
Шижтарен палемдыман, грипп дене черланыше-влак арня еда шукемыт. Ты гана медик-шамыч тыгай диагнозым 53 пациентлан шынденыт. 52 еҥлан СOVID-19 пижын, тиде чот тылеч ончычсо арня деч 2,2 пачаш кугу.
Вирусан инфекцийын талышнен шарлымыж жапыште кидым шовын дене чӱчкыдынрак мушкаш, паша ден илыме верлам южтараш, мебель ден гаджетым дезинфицироватлаш, черле еҥым кораҥын кошташ мондыман огыл. А черланаш тӱҥалмым шижмеке, медицине полышлан эҥерташ тыршыман.
Кылмен черланыме деч эмлалтме годым ик эн тӱҥ ситыдымашлан антибиотикым шке семын йӱмым шотлыман. Тиде препарат вирусан черым огеш чактаре!
Врач-влак неррожышко вӱргорным туртыктышо эмым чӱчкыдын чӱчалтарымыланат вурсат, молан манаш гын организм тидлан пеш писын тунем шуэш.
Медик-шамыч тыгак логар корштымо годым шокшо чайым йӱмӧ, логараҥым шокшо вӱд дене шӱалтыме ваштареш улыт. Чеснокымат шекланенрак кочкаш темлат, вет тиде пакчасаска паремаш тынаре огеш полшо, мыняре тазыла чорам аздара.
Вирусан инфекцийын авалтымыж годым шуко йӱаш кӱлеш. Лимонан ма мӱян (аллергий уке гын) чай, турнявӧчыж морс, чыве лем организмым кошкымо деч аралат да шкемшижмашым саемдат.
Грипп дене таҥастарымаште ОРВИ ден ОРЗ эркынрак вияҥыт. Ончыч куат пыта, логарыште кыжгымда, вара кокырыкташ, вуй коршташ, темпуратур кӱзаш тӱҥалеш, нер петырна. Кугыеҥын капкыл температуржо 37,5 градус марте кӱза, йоча-шамычын тылеч кугу лийын кертеш. Кылмен черланыме годым южгунам кочкышым шулыктарыме пашат пужла.
Тидымат шотыш налман: инкубаций манме жапыште, а тудо кок сутка марте шуйнен кертеш, айдеме кылмен черланымыжым огеш шиж, но инфекцийым уже шаркала.
Да эн тӱҥжӧ – врач дене вашмутланыде, шкем шке эмлыман огыл. Препаратым але тудын дозировкыжым йоҥылыш ойырен налмылан кӧра паремме олмеш тазалыкым утыр гына лунчырташ лиеш.
Маргарита ИВАНОВА ямдылен
Марий Элысе Роспотребнадзорын пресс-службыжын фотожо
