Чынак, кугу давлений деч ынде нылымше тылзе эмым огыл, а кислород дене пойдарыме вӱдым йӱам.
Мыланем – 81 ий. Гипертоний дене шукертак орланем. Шке жапыштыже вӱргорно давлением 200/120 мм марте кугемын. Эмлымверыштат ик гана веле огыл киен лектынам.
Тений июль тӱҥалтыш гыч эр еда вӱдым йӱаш тӱҥальым. Уке-уке, кувшин але чайник гыч темен налмым огыл, а ик чукыр гыч весыш 28 гана темкалымым! Шукынжо паледа, очыни, тиде йӧн вӱдым кислород дене пойдара.
Кок тылзе гыч гипертоний деч эмым суткаште 1 гана йӱаш тӱҥальым. Тымарте шкемым начарынрак шижынам да тидым суткаште 2 гана ыштенам.
Кызыт вӱргорно давлением кечеш 2 гана висем, тымарте 5 гана тергенам, молан манаш гын тудо эре тӧрштылын.
Кумшо тылзын ик чукыр гыч весыш темкалыме вӱдым кече коден йӱаш тӱҥальым. А эртыше арнян йӧршын шым йӱ, молан манаш гын давлением 130/70 – 120/60 мм лие. Но кокымшо арнян шкемшижмашем адакат начареме, давлением 160/80 марте кӱзыш. Да ынде адакат вӱдым йӱам! Эмым ом йӱ, но вӱргорно давлением кечеш 2 гана висем.
Газетым лудшо еҥын вӱдым ик чукыр гыч весыш темкалыме чот шотышто йодышыжо лектеш, очыни. Тиде индуизм философийын йога манме ик школжын числаже – 7 (7х4=28). Йӱшаш вӱд 250 мл деч шагал огыл лийшаш. Ик чукырым весыж ӱмбалне 60 см кӱкшытыштӧ кучыман.
Кран гыч налме вӱдым 12 шагат деч шагал огыл жап шинчыктыман.
Мый 400 мл вӱдым налам, молан манаш гын тудым темкалымем годым велем.
Кислород дене пойдарыме вӱдым изи нелтыш дене вигак йӱман. Тидым кочмо деч 1 шагат ончыч але 2 шагат вара ыштыман, но эрдене шуженеш йӱаш пайдалырак.
Т.АНДРЕЕВА
Звенигово район
