28 июньышто Йошкар-Олаште эртышашлык Пеледыш пайрем деч ончыч тиде кечышот, калык йӱла пайрем-влак верлаште калыкым чумырат.
Иктыштын тудо Пеледыш пайрем, весыштын Семык але Агавайрем маналтеш, фестиваль семын эрта гынат, радамышт икгайракак.
Теве кодшо каныш кечылаште Москваште эртыше Пеледыш пайрем годым марий-влак, Йошкар-Оласе йӱла семынак, таҥ тошкалын ошкылыныт, мурен-куштен, пайрем аланыш погыненыт. Нунылан Москосо Пресненский районын управыже лӱмын верым ойырен. Але марте тыге тӱшкан ошкылмашыже тыште лийын огыл.
Тений пайрем 15-ше гана эртен. Калык шуко погынен. Тушко Пошкырт, Урал, Татарстан гыч марий-влак ушненыт. Финн-угор тукымыш пурышо-шамычат лийыныт, увертарат Моско марий-влак.
Пайрем кумылым «Моско марий хор», «Тумывий», Санкт-Петербург гыч «Югорно» ансамбль-влак, марий эстраде мурызо-шамыч Светлана Яндукова, Агата Смирнова, Вероника Кондратьева, Владимир Албаев, Пошкырт вел гыч Сергей Байназов да молат нӧлтеныт.
Снимкыште: Москваште Пеледыш пайрем гӱжлен.
Фотом Моско марий-влакын землячествыжын воткыл лаштыкше гыч налме.
