22 мартыште «Сеҥымаш тулсавыш» фестивальыш Марий Турек районысо усталык коллектив-влак «Сеҥымаш дене кугешнена!» концерт программым аклаш луктын
Марий Турек район гыч Кугу Отечественный сарыш 13 тӱжем еҥым ужатеныт. Тушечын куд тӱжем утлаже пӧртылын огыл. Тушманым кырен шалатымаште лӱддымылыкым да чолгалыкым ончыктымылан ты кундемын латик шочшыжо Совет Ушем герой лӱм дене палемдалтын, тӱжем дене салтак орден да медаль дене наградитлалтын.
– Марий-влак кокла гыч Герой лӱмым эн ончычак мемнан землякна Сергей Романович Суворов налын, – фестивальыш погынышо-влак ончылно палемдыш Марий Турек муниципальный район администраций вуйлатыше Сергей Решетов. – Кызытат боецна-шамыч спецоперацийыште кугезына-влак семынак Шочмо элнам аралымаште пеҥгыдын шогат. Российын Геройжо лӱм дене Сергей Вячеславович Иштуганов палемдалтмыжат мемнам кугешнаш тарата.
Концерт программе Сеҥымаш кечым увертарымаш деч тӱҥале. А ме палена, тудын акше моткоч шерге! Салтак-влакын йӱштӧ-шокшым, колымашым ончыде, тушманым кырен шалатымыштым «Кантилена» ансамбль «Баллада о солдате» муро гоч келгын почын ончыктыш.
Кугу сар шуко ешыш ойгым конден. 1944-1955 ийлаште ача-авам, родо-тукымым йомдарыше икшыве-влаклан Марий Турек районысо Топкайэҥер посёлкысо йоча пӧрт шочмо суртыштым алмаштен. Тушто республикысе тӱрлӧ район, элнан тӱрлӧ кундемже гыч 200 утла йоча илен. 1944 ийыште Шора ялыш тулыкеш кодшо 50 икшывым конденыт. Нуным кулаклан шотлымо С.А.Силантьев деч поген налме пӧртышкӧ вераҥденыт. Йочапӧртым сар гыч пӧртылшӧ Кузьма Николаевич Стрельников вуйлатен. Йоча-шамычын кушкыншумеке, 1954 ийыште петыреныт. Тушто лийше-шамыч кокла гыч пелыжым олаш колтеныт, а молышт тушанак кодыныт да Мариец посёлкысо янда заводышто тыршаш тӱҥалыныт. Орлыкан илышын кочыжо экранысе сӱретла гоч чоным пудыратыш.
Сарыште эргыштым йомдарыше ава-влакын ойгырымыштым, шке падырашым изин-кугун вучымыштым «Карусель» ансамбль «Возвращайся» куштымаш гоч мастарын ончыктыш, а зал калык, шып шогалын, вуйым пыштыше салтак-влакым, шып шарналтыш. Елена Тюлькинан «Ветеранам минувшей войны» мурым мурымыж годымат зал калык рӱж кынел шогале. Тиде муро чон сусырым тарватыш…
Кугу сарыште тӱрлӧ калыкын шочшыжо кредалын. Марий Турек районышто марий, руш, татар да удмурт калык-влак шукертсек келшен илат, шке кундемыштым моктен мурат, куштат, калыкыштын йӱлашт ден тӱвыраштым арален толыт. Тидым «Зардон», «Карусель», «Рябинушка», «Арбор» ансамбль-влак мастарлыкышт гоч эше ик гана пеҥгыдемдышт.
Алевтина БАЙКОВА
Иван Речякинын фотожо
