«МАРИЙ ЭЛ» ТАЧЕ

Элна дене кугешнымаш тек кажне кечын вияҥеш!

Российын кечыж дене мемнан кугыжанышыште илыше-влакым Президент Владимир Путин саламлен. Элнан тӱҥ пайремжылан пӧлеклалтше торжественный мероприятий Йошкар-Олаште В.И.Ленин лӱмеш площадьыште эртен.
Погынышо-влакым Марий Эл вуйлатыше Юрий Зайцев саламлен да ты пайремын калыкнан икоян, Ачамландынан вияҥ толмо да эрыкан улмо символышкыжо савырныме нерген ушештарен.
«Калыкнан шочмо элым йӧратымыже, тудын тичмашлыкшым аралаш эре ямде улмыжо кеч-могай пагытыштат чыла чытен, тушман ваштареш шогалаш да сеҥен лекташ полшен. Кугыжанышна чыла йосылык гыч чап дене лектеш да шке куатшым, тыгак тӱнямбалне пагалымашым пеҥыдемден толеш», – каласен Юрий Зайцев.
Тудо Россий президентын посланийыштыже ойлымыжымат ушештарен: « Ме чыланат, Российын гражданже-влак улына, пырля эрыкнам, тыныс поян илыш дене илаш праванам аралаш тӱҥалына, шке гына шкенан вияҥме корнынам ойыраш, тукым гыч тукымыш кылнам пеҥгыдемдаш, тӱняумылымашна, йӱлана, верана почеш самырык-влаклан арален кодышашлык, кугыжанышна ончылно шогышо задаче-влакым решатлаш тӱҥалына.
Регион вуйлатыше ешарен: Марий Эл Ачамландынан вияҥмашкыже шке изи огыл надыржым пышта. Салтакна-влак кугыжанышнан интересшым СВО-што кӱлеш семын аралат, боевой задачым шуктымо годым лӱддымылыкым, героизмым ончыктат. Республикын экономикыже ден социальный сферылаште чыла сеҥымашыже Российлан вияҥаш да суверенитетшым пеҥгыдемдаш полша.
«Пагалыме йолташ-влак! Тек кажне кече тендан шнуй мландына дене кугешныме да ончыкылан ӱшаным пеҥгыдемда. Уло чон дене тыланда пеҥгыде тазалыкым, ончыкылык волгыдо илышлан ӱшаным да цельыш шумаште сеҥымашым тыланем. Пайрем дене!» – каласен Юрий Зайцев.
Вара тудо марий рӱдолаште илыше ийготыш шушо ӱдыр-рвезе-влаклан паспортым да шке сай паша дене ойыртемалтше еҥ-влаклан наградым кучыктен.
Марий Эл вуйлатышын администрацийжын пресс-службыжын уверже негызеш С.Носова ямдылен

Опубликовать в Одноклассники

Добавить комментарий