Марий Элым вуйлатыше Юрий Зайцев Россий Федераций Вооруженный Вийым ойпидыш почеш служитлаш келшыше граждан-шамыч дене комплектоватлыме йодыш шотышто совещанийым эртарен.
Республикыштына илыше-влак специальный военный операцийым эртарыме кумдыкышто героизм ден лӱддымылыкым ончыктат, нацизм ваштареш кредалмашке кугу надырым пыштат, палемден Ю.Зайцев.
«Специальный военный операцийын участникше-влак ден нунын ешыштлан полшымо пашаште раш системым ыштыме. Пӧръеҥ-шамычын Родиным, шке ешым аралаш шогалмышт кугу пагалымашым луктеш. Мый специальный военный операцийыште участвоватлыше землякна-влакын чылажат лийже да нунын пелашышт, йочашт, ача-авашт ласкан илышт манын шонем. Военнослужащийна-шамычлан республик гыч гуманитар грузым эреак колтен шогена, полшымо мере-влакым кумдаҥдена. Тиде пашам умбакыжат шуена», – манын тудо.
Республикыште палемдыме еҥ-влаклан социально полшымо 40 утла мере уло. Шукерте огыл Юрий Зайцевын кӱштымашыж почеш ойпидышым шке кумылын ыштыше граждан-шамычлан ик гана тӱлыман выплатым 250 тӱжем теҥге марте кугемдыме.
2023 ий 1 июль гыч регионыштына Россий президент Владимир Путинын кӱштымашыж почеш почмо «Элым аралыше-влак» кугыжаныш фондын филиалже пашам ышта. Тудо СВО-н ветеранже-шамычлан, кредалмаште вуйым пыштыше да сусырген колышо сарзе-влакын ешыштлан социально полша.
Тымарте фондыш 2000 наре граждан полышым: медицине ден социальный реабилитацийым, эмым, психологын консультацийжым, реабилитацийлан технический средствым да санаторий-курорт шотан организацийыш путёвкым, вес профессийлан тунемаш йӧным, ветеран-влакым пашаш пурташ – йодын миен.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
