12-15 июньышто Пекиныште «Здравый смысл» тӱнямбал фестиваль кышкарыште «Слово о русском сердце» культурно-просветительский проект илышыш шыҥдаралтын. Тудо Россий ден Китайын тӱвыра идалыкыштлан пӧлеклалтын. Пекинысе BJ EXPO ончер-комплексыште эртыше кугу мероприятийыш Марий Элын делегацийжат миен.
Тушто Г.Костантинов лӱмеш академическй руш драме театрын артистше-влак да пу гыч пӱчкедыше кидмастар Владимир Алманов лийыныт.
Ончерын тӱҥ сценыштыже артист-влак шке усталыкыштым ончыктеныт, а Владимир тулгайыкым ыштыме мастар-классым эртарен. Варажым ты мастар-классшым вес площадкылаштат ончыктен. Проект кышкарыштак тудо тыгак ешыжын усталык ончержым эртарен.
Каласен кодыман, Пекиныште лиймыж дене марий кидмастар пагалымашым сулен. Китай правительствын ӱжмыж почеш, В.Алмановым «Диалог по шёлковому пути» комитетын тӱнямбал аналитический рӱдержын тӱвыра шотышто экспертшылан ойыреныт. Ты фестивальыште Российын 24 регионжо гыч участник-влак лийыныт.
С.Носова
Снимкыште: В.Алманов фестиваль годым
Фотом В.Алмановын лаштыкше гыч налме.
