Тений пӱтынь Россий мучко, тыгодым Марий Элыштат, Кугу Отечественный сарын событийже-влак теме дене «Сеҥымаш диктант» тӱнямбал исторический акций 24 апрельыште лиеш. Тиде мероприятийлан ямдылалтме нерген «Единый Российын» Мер полыш штабыштыже эртаралтше паша совещанийыште мутланеныт. Тудым региональный отделенийын секретарьжын икымше алмаштышыже Михаил Васютин вӱден.
«Сеҥымаш диктантыш» кумылан кажне еҥ – школышто тунемше гыч тӱҥалын пенсионер марте – ушнен кертеш. Тений акций кок кугу датылан: Кугу Отечественный сар тӱҥалмылан 85 ий теммылан да маршал Георгий Константинович Жуковын шочмыжлан 130 ий теммылан – пӧлеклалтеш.
Акцийлан ямдылалтмаш кузе эртыме нерген «Единый Россий» партийын Марий региональный отделенийжын регионысо исполнительный комитетшын вуйлатышыже Матвей Галяутдиновын палдарымыж почеш, диктантым возаш кумылан-влаклан 300 утла площадкым регистрироватлыме. Мероприятийыш 9000 утла еҥ ушна манын палемдалтеш.
Тӱҥ площадке Йошкар-Олаште Калык-влак келшымаш пӧртыштӧ лиеш. Тыгак «Герои Отечества» тоштер-патриотический рӱдерыште, «Защитники Отечества» фондын филиалыштыже, школлаште, книгагудылаште, тоштерлаште да эсогыл кугу предприятийлаштат возаш лиеш. Кӧлан тидым паша гыч торлыде ышташ йӧнанрак, диктантпобеды.рф. сайтыште онлайн ушнен кертеш.
25 йодышлан вашмутым пуаш 45 минут ойыралтеш. Чыла йодышлан чын вашештыше да сеҥышыш лекше-влаклан Почетан дипломым, а эн сай деч сайже-влаклан 9 майыште Москваште Йошкар площадьыште эртаралтше Сеҥымаш Парадыш ӱжмашым кучыктат.
– «Сеҥымаш диктант» гай акций-влак исторический чыным арален кодаш да историйнам уэш возаш полшат. Диктантым возаш самырык-влакын кугу кумылышт улмо куандара. Тидыже ончыкыжым ӱдыр-рвезе-шамыч Кугу Сеҥымаш нерген урлык-тукымлан чын шинчымашым кодат манын ӱшаным пуа. Диктантым возымашке Кугыжаныш Погынын депутатше ден Молодежный парламентын еҥже-влакат кажне гана ушнат, – акцийлан кузе ямдылалтме нерген каласкалымыж годым палемден Михаил Васютин.
Любовь Камалетдинова
