Марий Эл правительстве председательын алмаштышыже Степан Воронцов 1 августышто чрезвычайный ситуаций шотышто комиссийын черетан заседанийжым эртарен. Тушто 29 июльышто озаланыше озыркан мардеж да шолемлан кӧра лийше азапым кораҥдыме шотышто могай паша ышталтмым лончыленыт.
Рушарнянак палемдыме задаче да темлымаш-влакын шукталт толмышт нерген министерстве, ведомство да муниципал образований вуйлатыше-влакын докладыштым колыштмо. Правительстве председательын алмаштышыже чыла службын икте-весе дене кылым келыштарен ыштымыжым сай могырым палемден. Эҥгекыш логалше объектлаште электротулым уэш пуаш тӱҥалме да тудо штатный схеме почеш кая. Социальный объектлаште, еҥ-влакын сурт-оралте коклаштышт олмыктымо пашам шуктат, чодыра корным эрыктат.
Илемлаште азапын эҥгекшым лишыл жапыште кораҥдыман, палемден Степан Воронцов.
«Чрезвычайный ситуаций лийын кертме, тудын эҥгекшым иземдыме да кораҥдыме шотышто пашам саемдыме мера-влакым ыштыман», – каласен тудо.
Марий Эл Республикым вуйлатышын администрацийжын информаций пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо