Кодшо каныш кечылаште Оршанке район Тошто Крешын ялыште, Ошла эҥер воктене, «Эҥер вӱд ӱмбалне» фестиваль-конкурс эртен.
Марий композитор да поэт изак-шоляк Евгений ден Арсий Волковмытын творчествыштлан пӧлеклалтше кудымшо фестиваль тений Волжский, Марий Турек, Медведево, Советский, Оршанке, У Торъял, Морко районла гыч посна мурызо, вокал-хор коллектив, почеламутым лудшо, изи форман театр-влакым чумырен. Сандене фестивальын программыже поян лийын: иктышт муреныт, весышт почеламутым лудыныт, а кумшышт спектакль гыч сценкым модыныт. Мутлан, У Торъял район гыч Ольга Рябинина ден Людмила Петрова Арсий Волковын «Оръеҥ мелна» пьесыж гыч ужашым ончыктымыштлан фестивальын Гран-приж дене палемдалтыныт. Мут толмашеш, ты район гычак «Торъял кундем» ансамбль кок мурым йоҥгалтарен. Ойыртемалтше-влакым фестивальын участникшын дипломжо дене палемденыт.
Советский районысо Кугу Ӧрша селасе тӱвыра пӧрт гыч «Ӧрша кундем» ансамбль икымше верым сеҥен налын.
Снимкыште: сценыште – «Оръеҥ мелна» пьесе гыч ужаш.
Фотом У Торъял рӱдӧ клуб системын воткыл лаштыкше гыч налме.
