Марий кундемысе яндар вӱдан эҥер-влак байдарке да катамарн дене тӱшкан ийын кошташ йӧратыше-влакым кумылаҥденак шогат.
Ӧрдыж кундемла гычат шукын толыт. Эн йодмашан маршрут-влак Кугу Какшан (Старожильск гыч тӱҥалын, Звенигово район Какшамарий кӱвар марте), Изи Какшан (Куяр посёлко гыч Оршанке район Шулко села марте) да Элнет эҥерла мучко эртат.
Тидын шотыштак Россий МЧС-ын Марий Элысе виктемжын специалистше-влак турист-влакым палдарат:
- Тӱшка вӱд маршрутыш лекме деч 10 кече ончыч группым МЧС виктемыште регистрироватлыман. Тидым ведомствыш толын але официал сайтыштыже посна формо почеш, тыгак почто серыш але электрон почто полшымо денат ышташ лиеш.
- Путешествийыш тарваныме деч ончыч ийын кайыме средствым, утарыше да сигналым пуышо оборудований ден кылым ыштыме йӧн улмым шотыш кондыман.
- Игече начарештын гын, кечым лучо вес жаплан кусараш келшен толеш.
- Вӱдыштӧ лӱдыкшыдымылык правилым шуктыман:
– пырля налме пого але арвер уто нелытан лийшаш огыл, ийын кайыме средстве чытышаш;
– утарыше жилетым чийыман;
– ийын кайыме средстве эре шинча ончылно лийшаш;
– пычкемышлан канаш серыш шогалман.
- Йоча тӱшка дене ийме годым лу икшывылан ик кугыеҥ лийшаш.
Чрезвычайный ситуаций годым 101 але 112 номер дене йыҥгыртыман.
Снимкыште: эҥер дене ийше-влак канаш шогалыныт.
Фотом Россий МЧС-н Марий Элысе виктемжын воткыл лаштыкше гыч налме.
