Марий Эл вуйлатыше Юрий Зайцев «Единый Россий» Всероссийский политический партийын председательже Д.А.Медведевын регионысо общественный приёмныйыштыжо граждан-влак дене вашлийын мутланен.
Приёмыш толшо-влак автомашина кудалыштме корным да тротуарым олмыктымо йодышым тарватеныт.
Кужэҥер посёлко гыч Василий Сидоркин Заречный уремын 18-ше №-ан деч 31-ше №-ан пӧрт марте асфальт да бетон шартышын йӧрдымыш лекмыж шотышто вуйым шийын.
«Районышто шуко ышталтеш: корным чоҥат, тӱвыра объект да школ-влакым олмыктат. Туге гынат, каласыме корно кутыш посёлкышто илыше-влаклан, транспорт дене кудал эрташ йӧндымылыкым луктеш. Тиде йодышым решатлаш полшеда манын ӱшанена», – мутшым савыралын Василий Сидоркин.
Куженер районышто кызыт икмыняр объектыште паша кая, палемден Марий Эл вуйлатыше да йодмо корным олмыктымо пашам тенийысе планыш пурташ кӱштен.
Оршанке район Марково ялысе йочасад вуйлатыше Оксана Сенцова Восточная уремым олмыкташ йодын. Тудын мутшо почеш, воктенак йочасад, ФАП верланеныт, ты корно дене школ автобус кудалыштеш.
Марий Эл вуйлатыше вашештен: корно социальный йодыш дене кылдалтын, сандене августышто тудым шотыш кондыман. Чоҥымо пашам шуктышо подрядчикым ойырымо, тунамак увертареныт Юрий Зайцевлан.
Йошкар-Олаште илыше Роман Михеев Панфилов уремын пурла велымже (Первомайский урем могырым) йолешке-влакын корныштым тӧрлаш йодын. Ты корно дене еҥ-влак школыш да йочасадыш коштыт.
Вуйлатыше тротуарым кок арня жапыште олмыктен шукташ задачым шынден.
«Шагал гынат, но районлаште да олалаште ме корным ышташ тыршена, кӱлеш участкылаште нормативын йодмыж семын тӧрлена. Граждан-влакын йодмашышт негызлалтше улыт, сандене нуным кеҥеж мучашлан шуктыман», – палемден Юрий Зайцев.
Марий Эл Республикым вуйлатышын администрацийжын
информаций паша пӧлкажын уверже негызеш
Л.СЕМЕНОВА ямдылен
Д.Речкинын фотожо
