2 августышто республикыштына Юж-десант войскам ыштымылан 94 ий темме лӱмеш пайрем мероприятий-влак эртеныт. Тушто Марий Эл правительстве председательын алмаштышыже Степан Воронцов лийын.
Пайрем кече ВДВ-ын командующийже, Совет Ушем Герой, армийын генералже Василий Маргеловын да Российын Геройжо Марк Евтюхинын бюстышт воктеке пеледышым пыштыме церемоний дене тӱҥалын. «Шулдыран пехотын» вуйым пыштыше сарзыже-влакым ВДВ-ын ветеранже-шамыч ешышт дене, мер да молодёжный организаций-влакын еҥышт шарналташ чумыргеныт.
Мероприятийын участникше-влакым Йошкар-Ола мэрын пашажым жаплан шуктышо Антон Трудинов саламлен да юж-десант войскам Россий Воооруженный вийын элитыже, землякна-шамычын специальный военный операцийыште десантникын лӱмжым кугешнен нумалмыштым палемден, десантник-влаклан Марий Элым вуйлатышын Таумутшым кучыктен.
Пайрем мероприятий Медведево районысо Пӱнчерсола ялыште верланыше аэродромышто шуйнен. Тушто ВДВ-ын ветеранже-влак купол дене виктарыме кӱкшӧ пилотажым ончыктеныт. Тыгак парашютист-шамыч флаг дене тӧрштеныт, таҥасымаш-влак эртеныт, пайрем концерт лийын.
Марий Эл правительстве председательын алмаштышыже Степан Воронцов калыкым пайрем дене саламлен да десантник-шамычын элым аралымаште кугу верым налмыштым, чыла боевой задачым кӱлын шуктымыштым палемден. Мутшо почеш, «шулдыран пехотын» сарзыже-влак эреак пеҥгыде койыш-шоктышышт, кӧргӧ вийышт, лӱддымылыкышт дене ойыртемалтыт, героизмын примерже улыт.
Марий Элым вуйлатышын пресс-службыжын уверже негызеш М.ИВАНОВА ямдылен
