1 февральыште Марий кугыжаныш университетын Педагогический институтыштыжо лач тыгай лӱман у лабораторий почылтын. Тиде кумдык – школыш коштдымо да коштшо йоча-влаклан.
Тудым почмо годым Марий Эл образований да науко министр Лариса Ревуцкая каласен: «Республикылан тиде – кугу событий. Образований системыште цифровизаций кызыт чыла вере. Кечын илышышкына у электрон тунемме ресурс, технологий пурталтыт. Ончыч тидын нерген школ шотышто гына ойленна гын, ынде цифровизаций йочасадлашкат толеш. Сандене йӱлаш пурышо туныктымо йӧным тачысе кечылан келшыше дене пырля пайдалын кучылтман. Университетын у лабораторийыштыже дошкольный организацийлан специалистым ямдылаш чыла йӧным ыштыме, тудо кызытсе илышыш йодмашыжым шуктен кертеш».
У тунемме кумдык нерген проектым вуйлатыше, педагогике науко доктор Светлана Фёдорова каласкален. «Тыште улшо цифран оборудований йочан уш-акылжым вияҥдаш, тудым физический шуараш йӧным ышта. Занятий-шамыч ийгот дене келшышын эртаралташ тӱҥалыт», – каласен тудо.
Г.Кожевникова
Фотом Марий кугыжаныш университетын сайтше гыч налме
