Таче Йошкар-Олаште Марий Элын Калык-влак келшымаш пӧртыштӧ «Российысе калык-влакын ассамблейышт» общероссийский мер- кугыжаныш организацийын регионысо пӧлкажын заседанийже эртен.
Тудым регионысо пӧлкам вуйлатыше Лариса Яковлева вӱден. Заседанийыште Марий Элым вуйлатыше Юрий Зайцев, Кугыжаныш Погын председатель Анатолий Смирнов участвоватленыт.
«Мемнан республик тӱрлӧ йылме дене мутланыме да тӱрлӧ конфессиян калык илыме дене ойыртемалтеш. Марий Элын историйже поян да тӱвыраже ойыртемалтше. Тудо 50 утла тӱрлӧ калыкым уша.
Республикын кугыжаныш национальный политике концепцийже айдемын праважым да эрыкшым эн кӱшкӧ шында, калык-влакын исторический, национальный ден духовный йӱлаштым, тӱвыраштым, йылмыштым арален кодаш манын, иктӧр улмо шукталтеш.
Россий Президент В.Путинын палемдымыже почеш, Российысе калык-влакын ассамблейышт кажне регионышто ик обществын гражданже-влак улмо умылымашым, тӱрлӧ калык да религий кокласе кылым пеҥгыдемден толшаш, вет еҥ-влак шукынжо шкеныштым этнический тӱшкан еҥыштлан огыл, а эн ончыч Российысе обществын, кугыжанышын гражданжылан шотлат. Ассамблей Марий Элыште илыше калык-влакым иктыш ушышо организаций лиеш манын ӱшанем. Серен шке Телеграмм-каналыштыже Марий Эл вуйлатыше Юрий Зайцев.
С.Носова
