Лӱдыкшыдымӧ сай качестван корно
Чыла кӱварым – жапыштыже
Куан дене каласен кертына: «Лӱдыкшыдымӧ сай качестван корно» нацпроект почеш тений чоҥен але олмыктен шукташ палемдыме чыла 18 кӱварым пашаш колтымо. Тушечын иктыжым чоҥымо, кудытым капитально, а молым тыглаяк олмыктымо. Нуно эн ончычак илышлан кӱлешан объектлашке логалаш йӧным ыштат.
Республик мучко чылаже 185 кӱвар шотлалтеш, нунын чумыр кужытышт 8505 метр лиеш. Нацпроект кӱшеш 2022 ий гыч чылаже 45 кӱварым олмыктымо, тыге чумыр кужыт гыч 50 процентшым нормативлан келшышын тӧрлен шуктымо.
Кызыт корно веле огыл, кӱварат ончылгоч олмыкталтеш. Тыге тений сдатлыме 18 кӱвар гыч визытшым ӱмаштак олмыкташ пижме, сандене нуным – Советский районышто Ӱшӱт ден Шогаль, Кужэҥер районышто Купшерка, Шернур районышто Шаба, Морко районышто Арым эҥерла гоч – идалык тӱҥалтышланак тӧрлен шуктымо. А Марий Турек районышто Китника эҥер гоч кӱвар кеҥеж кыдаллан ямде лийын.
Сезон мучашлан иканаште 11 кӱварыште – Советский районышто Шуля да Роҥго, Курыкмарий районышто Сундырка да Кожваж, Кужэҥер районышто Лаж, У Торъял районышто Шуй, Марий Турек районышто Уржум, Морко районышто Морянка, Параньга районышто Буй, Звенигово районышто Ӱшӱт эҥерла гоч – пашам мучашлыме. Тений эн вара Шернур районышто Тулгем эҥер гоч кӱварым сдатлыме.
Тылеч посна тений Одывлак – Кужэҥер – Параньга автомобиль корнын пужен ыштыме 5-ше гыч 9-ше километр ужашыштыже Немде эҥер гоч кӱварым пашаш колтымо, кеч тудым 2019 ийыштак чоҥымо.
Юрий ИСАКОВ
Снимкыште: Ургаш – Роҥго – Морко корнын 26-шо километрыштыже Ӱшӱт эҥер гоч кӱвар.
Фотом «Марийскавтодор» ГКУ деч налме
