«Сосновый бор» санаторийыште реабилитацийым эртыше СВО-н участникше-влаклан поро кумыл концертым шынденыт. Тудым организоватлыше-шамыч кокла гыч иктыже – Марий Эл Кугыжаныш Погын председательын икымше алмаштышыже Лариса Яковлева.
Специальный военный операцийын участникше-влаклан йол ӱмбак шогалаш полшымо программым Марий Элым вуйлатыше Юрий Зайцевын темлымыж почеш ямдылыме. Ветеран-влак опытан врач-шамычын палемдымышт почеш кок арня жапыште тазалыкым пеҥгыдемдыме чыла процедурым эртат. Психолог-влакат пашам ыштат: стрессым чактараш, тыныс илышлан келыштаралташ полшат.
Ветеран-влакын кумылыштым Оксана Бойцова, Эльвира Токташева, Геннадий Васильев, Василина Решта нӧлтеныт. Концертыш мийыше калык артист-шамыч дене пырля руш да марий муро, романс-влакым мурен, кунамже тавалтен.
Лариса Яковлева чылалан пеҥгыде тазалыкым, пиалым да, мутат уке, сеҥымашым тыланен.
«СВО-што улшо сарзына-влаклан кертме семын полшымо, нунылан гуманитар грузым погымо деч посна ме тыныс илышыш пӧртылшӧ, республикнан эмлымверлаштыже да санаторийлаштыже реабилитацийым эртыше-шамычымат тӱткыш деч посна огына кодо. Таче ветеран-влакын шыргыжмыштым ужын, тидын кӱлешлыкшым эше ик гана умылышым. Чайым йӱмӧ годым шуко нерген мутланышна. Йодыш-влак улыт, нуным решатлаш кӱлеш. Тӱҥжӧ – пӧръеҥ-влак ончыкылык нерген шонат. Нуно шочмо элым йӧратыше сай айдеме улыт. Чон йодеш гын, кушташ кӱлеш, эл йодеш гын – аралаш. Нуно тидын дене тӱрыснек келшат», – палемда депутат.
Маргарита ИВАНОВА
Марий Эл Кугыжаныш Погынын фотожо
