Марий Элым вуйлатыше Советский районышто паша дене лиймыж годым корным чоҥымо йодышлан тӱткышым ойырен.
Тудо Советский ден Морко кундемлам ушышо 55,2 километр кужытан Ургаш – Роҥго – Морко автомобиль корным олмыктымо пашам ончен. Тушто 2023 ийыште 8,46 километрым шотыш кондаш палемдыме.
Марий Эл Транспорт да корно озанлык министр Александр Желонкинын мутшо почеш, паша график почеш ышталтеш, объектым сентябрьыште сдатлаш палемдыме.
Юрий Зайцев тыгак Советский посёлкысо 2-шо №-ан школышто лийын. Ушештарена, кызыт тушто тӱҥ оралтым капитально олмыктат. Подряд организацийым вуйлатышын каласкалымыж почеш, объектыште демонтаж ден штукатур пашам ыштыме, тыгак 1-ше дене 2-шо класслаште, актовый залыште да моло вере пырдыжым чиялтыме. Лишыл жапыште чоҥышо-влак спортзал ден пищеблокым олмыкташ тӱҥалыт. Таче кечылан оралте 72 процентлан ямде.
Школ директор Наталья Чепайкинан ойлымыж гыч тыге: Юрий Зайцевын кӱштымашыже почеш, тунемме вер тений 1 сентябрьлан пӱтынек уэмеш, вет капитально олмыктымо деч посна 8,4 миллион теҥгелан у мебель ден оборудованийым налыт.
Марий Элым вуйлатыше палемден: шушаш у тунемме ийлан объект ямде лийшаш. Тудо моло школыштат капитально олмыктымо пашам ыштымым терген шогаш кӱштен.
Ты кечын Юрий Зайцев тыгак Роҥго карьерыште лийын, а мучашлан районысо администрацийыште совещанийым эртарен. Погынышо-влак муниципальный образованийын социальный да экономике могырым вияҥмыже, ончыкылык паша дене кылдалтше йодышлам каҥашеныт. Юрий Зайцев районысо кум тӱвыра пӧртым – Советский, Солнечный посёлкылаште да Шнаран селаште – олмыкташ роскотым шотлен лукташ да тиде средствам ойыраш, тыгак Ронго кыдалаш школын кумдыкыштыжо асфальт шартышым шотыш кондаш кӱштымашым пуэн.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
