Медведево район Руэм посёлкысо кыдалаш школышто тунемше-влак кумшо чырыкым кызытсе жаплан келшыше оралтыште тӱҥалыныт.
Тунемме верлан ешартыш зданийым «Образований» нацпроект кышкарыште 2023 ийыште чоҥаш тӱҥалме да ӱмаште шыжым мучашлыме. Тыге тунемше-влаклан эше 725 у верым почаш йӧн лектын.
Тиде кечылаште тушто Марий Элым вуйлатыше Юрий Зайцев лийын.
«Тыгай школ чоҥалтымлан куанем. Ты пашам умбакыжат вияҥдаш тӱҥалына. Тыгай йӧным ыштымылан мемнан президент Владимир Владимирович Путинлан тауштем», – палемден тудо.
Кум пачашан ешартыш оралте 4 блокан. Тушто 32 тунемме кабинет, кок спортзал, скалодром, 700 веран актовый зал, мастерской, книгагудо, йоча тӱҥалтышлан кумдык, кочкышым ямдылыме блок, 375 веран кочмывер, медицине кабинет, ешартыш образованийым пуаш пӧлем-шамыч улыт. Тунемме вер воктенысе спорт стадионым уэмдыме. Чыла тидын деч посна «Образованийын школ системыжым уэмден вияндымаш» программе почеш школын улшо оралтыжым капитально олмыктымо.
Палемдыман, 420 веран Руэм школ 1969 ийыште чоҥалтын. Тушто йоча-влак кок смене дене тунемыныт, сандене у корпус моткоч кӱлешан.
Марий Эл Республикым вуйлатышын пресс-службыжын уверже негызеш Галина Кожевникова ямдылен
