Марий Эл вуйлатышын пашажым жаплан шуктышо Юрий Зайцев 11 августышто Чоҥышын кечыжлан да 13 августышто Физкультурникын кечыжлан пӧлеклалтше торжественный мероприятийлаште лийын да погынышо-влакым саламлен.
«Республикын правительствыже чоҥымо пашам ик эн кӱлешанлан шотла. Ты отрасль ятыр социальный да экономике задачым шукташ, граждан-влакын илыме условийыштым да коммунал озанлыкын услугыж дене пайдаланыме йӧным саемдаш, илыме верым ситараш полша. 2027 ийлан Марий Элыште кок миллион утла квадрат метр илыме верым чоҥаш палемдыме», – каласен Юрий Зайцев. Чоҥымо пашаште ятыр ий тыршыше-влаклан тудо кугыжаныш наградым кучыктен, «Марспецмонтаж» АО-н генеральный директоржо Хамза Баширов «За заслуги перед Марий Эл» I степенян орден дене палемдалтын.
Спортсмен, тренер, спортын ветеранже да спортым йӧратыше-влакым саламлышыжла Юрий Зайцев «Мый изинек спорт дене кылым кучем, кызытат, яра жап пеш чӱдӧ гынат, заниматлымем ом чарне» манын ойлен. «Спорт – илышын нормыжо» нацпроект почеш илемлаште, посёлкылаште – кеч изи да спортплощадкым ыштыме, тидланже Россий правительствылан да элнан президентшылан тауштен. Ешарен: районлашке лектын коштмыж годым туддеч хоккей площадкым, стадионым почаш йодыт, сандене спорт объект-влаклан кугу тӱткыш ойыралташ тӱҥалеш.
Юрий Зайцев спорт аланыште ойыртемалтше-влаклан тыгак наградым кучыктен.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
Д.РЕЧКИНЫН фотожо
