5 апрельыште М.Шкетан лӱмеш Марий национальный драме театрыште руш драматург Виктор Розовын «Вечно живые» пьесыж почеш шындыме «Чоҥешта турня кашта…» спектакльын премьерже лиеш.
Тидын вашеш журналист-влаклан пресс-конференций эртаралте.
Произведенийым автор 1943 ийыште госпитальыште кийымыж годым возен. Тушто Кугу Отечественный сар жапын кочо илышыже, сӧй пасушто кредалше да тылыште тыршыше-влакын пӱрымашыштым сӱретла.
Алексей Ямаев, спектакльын режиссёр-постановщикше:
– 1957 ийыште ты пьесе почеш «Летят журавли» фильм лектын да калыкыште кумдан шарлен. Но тудым чылт произведений почеш войзен огытыл. Ме авторын текстше почеш у спектакльым шындена. Марлаш тудым Марий Элын калык писательже Зоя Дудина кусарен.
Сценысе историй кызытсе жаплан келшен толеш, садлан тудо чоным тарвата. Драматургий пеш сай, тӱҥ геройым посна палемдыман огыл, тыште кажныжын шке историйже уло. Спектакльыште тӱҥ шотышто кугу ешын илышыже ончыкталтеш.
Спектакльлан сценографийым сӱретче Сергей Таныгин ыштен, костюм-влакым Лариса Воробьёва ямдылен, семым композитор Григорий Архипов возен.
Григорий Архипов, композитор:
– Творчествыштем военный теме ик эн ончыл верым айла. «Они сражались за Родину» – эн йӧратыме кинофильмем, тыгак «Иди и смотри» да «Летят журавли» фильм-влакым ончаш келша.
Мылам спектакльлан музыкым возаш кӱлмӧ нерген режиссёр ойлымек, моткоч куаненам, вет йӧратыме темылан музыкым возаш йӧн пуалтын. Мо мыйым кумылаҥден? Сеҥымаш кече – мемнан кугезе тукымын Кугу Сеҥымашым лишемдымышт.
– Пьесым лудмеке, фильмым ончымеке, ойго дене кепшылтше, илышлан ӱшаным йомдарыше ӱдырын рольжо моткоч нелыла чучын, но… – ойла Вероникан рольжым модшо Марина Воронцова. – Артистым сар теман спектакль-влак ик семынже пойдарат, вет тушто драматизм уло. Тыгай постановкышто йӱштӧ чон дене модаш огеш лий: сар теме чоным тарвата. Но мемнан паша тугай – чылажымат чон гоч колтен модаш.
Усталык шӱлышан тиде команде ынде икмыняр спектакльым пырля сценыш луктын да сеҥымашке шуын. Тугеже тиде постановкат калык чоным тарвата манын, ӱшаныме шуэш.
Алевтина БАЙКОВА
Михаил Скобелевын фотожо
