Тений Марий Элыште «Здравоохранений» национальный проектым илышыш пурташ 1,8 миллиард утла теҥгем ойырымо.
Республикна Россий президент Владимир Путинын тӱҥалтышым ыштыме «Здравоохранений» национальный проектым илышыш пуртымашке ушнен. 2024 ийыште чылаже 1,8 миллиард теҥгем финансироватлаш палемдыме, тымарте 1,5 миллиард теҥгем кучылтмо. Кодшо средствам идалык мучаш марте кучылт шукташ палемдыме.
Россий правительстве председательын алмаштышыже Татьяна Голикова «Здравоохранений» национальный проектым илышыш пуртымо шотышто совещанийым видеоконференций режимыште эртарен. Тушто Марий Элым вуйлатыше Юрий Зайцев участвоватлен.
Ойырымо оксан кугурак ужашыжым – 347,9 миллион теҥгем – «Здравоохраненийын первичный звеножым модернизироватлымаш» регионысо проектлан ойырымо. Тудын кышкарыштыже Йошкар-Оласе йоча больницын 2-шо №-ан поликлиникыже чоҥалтеш. Сменыште 500 йочам приниматлен кертше кызытсе жаплан келшыше поликлинике 22 тӱжем икшывылан сай медицине услугым ышташ тӱҥалеш. 2024 ийыште объектым чоҥымо пашалан 155,7 миллион теҥгем кучылташ палемдыме.
Звенигово районысо рӱдӧ больницын поликлиникыжым палемдыме жап деч ончыч капитально олмыктен шуктымо. Тиде медицине тӧнежын вич терапевтический да кум педиатрический участкылашкыже 12 тӱжем утла еҥым пеҥгыдемдыме.
Национальный проектын эше ик кӱлешан ужашыже – Марий Элын медицине тӧнежлашкыже тӱрлӧ оборудованийым ситарымаш. Тений 125 миллион теҥгеаш 9 медицине оборудованийым налме.
«Марий Эл Республик здравоохранений системын медицине организацийлаштыже квалифицироватлыме кадрым ситарымаш» регионысо проектын кышкарыштыже специалист-влакым шкенан эмлымверлаште пашам ышташ кумылаҥдымашке виктаралтше социальный полыш ойыралтеш. Ик эн кӱлешан мерылан илыме верым саемдаш 3 миллион теҥге кугытан ик гана тӱлалтше пособий шотлалтеш. Служебный илыме верым ойырымо, специалист-влаклан ялысе медицине организацийлаште пашам ыштымыштлан ешартыш оксам тӱлымӧ, илыме да коммунал услуго роскотым компенсаций шот дене пӧртылтымӧ гай полышат кӱлешан улыт.
Марий Эл Республикым вуйлатышын администрацийжын пресс-службыжын уверже негызеш Маргарита ИВАНОВА ямдылен
Д.Речкинын фотожо/ Марий Элым вуйлатышын пресс-службыжо
