Йошкар-Олаште, Изи Какшан эҥер воктене, «Чарла кол шӱр» фестиваль икымше гана эртен, но тудо поро йӱлаш савырна манын шонаш чыла амал уло.
Молан манаш гын, тудым эртараш организатор-влак моткоч сылне верым ойырен налыныт. Шернур кугорно деч тораште огыл, эҥер пелен тынар калыкым чумыраш лийше алан уло манын шоналтынат огыл. Мероприятийын организаторжо «Царевококшайский хутор» казак-влакын обществышт лийын. Фестивальым эртараш Марий Эл правительствын, Спорт да туризм министерствын, Йошкар-Ола мэрийын, «Защитники Отчества» фондын да «Боевое братство» организацийын полшымышт тудын кӱкшытшым нӧлталын.
Сценыште организатор, уна-влак мутым ойленыт, воктенак ӱдыр рвезе-влакым кредалаш, шкем аралаш туныктеныт, кумшо вере тӱрлӧ саргурал дене кузе пайдаланаш кӱлмым ончыктеныт, парашют дене тӧрштылаш туныктеныт.
А теве сцене ваштареш ик радамыште команде-влак кажныже шкенжын колшӱржым шолтен. Фестивальыште сеҥымаш верч гына огыл нуно тыршеныт. Пӱртӱс лоҥгаште команде дене кочкышым ямлымыжак мом шога! Мутлан, «Защитники отечества» фондын еҥже-влак «Салтак кол шӱрым» шолтеныт. «Талешке-влакын кол шӱрыштым» Мамырык-влакым военно-патриотический шӱлышеш шуарыше «Авангард» рӱдер ямдылен. «Вагнер» добровольческий ушем «Музыкант-влак деч» кочкышым темлен. Каласен кодыман, район кокла гыч Советскийын веле командыже лийын. Нунын шӱрышт «Крупняков семын» маналтын: ты кундемыште шочын-кушшо лӱмлӧ писательым огыт мондо, коеш. «Царевококшайский хутор» казак-влакын обществыштын лемыштым «Казак-влакын кол шӱрышт» манын лӱмденыт. «Единый Россий» партийын еҥже-влак «Кол шӱр-ер» дене сийленыт. Иктышт форельым, весышт карпым, моло колымат чес ямдылаш кучылтыныт. Южышт иканаште кок тӱрлӧ колымат пыштеныт. «Талешке-влакын кол шӱрыштым» шолтымашке кок организаций ушен:«Юнармий» да «Авангард». Теве «Вагнер» ушемын командыжын шеф-поварже Евгения Глушкова шӱрым шолтышо-влак коклаште ик ӱдырамаш лийын.
Кажне командын кочкышыжо ойыртемалтше лийын. Нуным пайремыш толшо кажне еҥ тамлен кертын, вет кол шӱр оза-влак жюрин аклымыж деч вара чылаштым сийленыт. Жюрин иктешлымашыже тыгай лийын: «Эн популярный кол шӱр» номинацийыште сеҥышыш «Защитники Отечества» фондын «Салтак кол шӱржӧ» лектын. Тыгак «Вагнер» ушемын да «Царевококшайский хутор» обществын кочкышышт «Эн ойыртемлтше» да «Эн нугыдо» семын палемдалтыныт. Нунылан шергакан призым кучыктеныт. А нуным вара СВО-што улшо салтак-влаклан колтат.
Фестивальыш «Теплая речка» трактират ушнен. Тудын пашаеҥже-влакат кол шӱрым шолтеныт. Тушко шийголым, шылаголым, нужголым кучылтыныт. Колжым трактир озан Иван Антроповын шочмо кундемже – Юрино район – гыч конденыт. «Изи годсек шарнем, мемнан дене кол шӱрым лач тыге шолтеныт. Тушко эше муным луген ешареныт», – каласыш Иван. Тыгак трактир пашаеҥ-влакын шийгол гыч кӱктымӧ шашлыкшат тамле лийын.
Ты фестивальын организаторжо-влак мероприятийым СВО участник, боевой действийын ветеранже-влаклан, нунын ешыштлан пӧлекленыт. Икте-весышт дене сцене гычат палдареныт, нунылан художественный номер-влакымат пӧлекленыт. Тыгай муро-влакым колыштат да, кызыт СВО-што вуйым пыштыше рвезына-влакым шоналтен, шинчавӱдат лектын. Туге гынат, фестиваль чылаштлан келшен, шонем. Ик татлан шуко еҥым пырля ушен.
Светлана Носова
Снимкыште: фестивальыш пурымаште.
Авторын фотожо.
