«Медведевоагродорстрой» ОАО
Чапле корно да сӧрал бульвар
Республикыштына корным чоҥышо да олмыктышо предприятий-влак шагалын огытыл. Но ме южышт нерген шагал палена. А пален налына гын, ӧрын колтена: могай кӱлешан пашам нуно ыштат!.. Моло деч нимынярат начарын огыл, а южо шотышто сайынракат. «Медведевоагродорстрой» ОАО нергенат тидымак ойлаш лиеш.
Тыгай лӱмым тудо кодшо курымысо 90-ше ийла мучаште налын, а пашажым «Медведевский» ДСПМК семын 70-ше ийлаштак тӱҥалын. Йол ӱмбаке шогалме пагытыштыже предприятий ялозанлык объектла деке корным чоҥымо пашам шуктен. А озанлык-влак пыташ тӱҥалмеке, корным олмыктымашке да ола кумдыкым тӱзатымашке ушнен. Но эн вияҥме жапше пытартыш ныл-вич ий – федерал кӱкшытан «Оласе йырвелым йӧнаным ыштымаш», «Лӱдыкшыдымӧ чапле корно» национальный проектлам да республик кӱкшытан проект ден муниципал программылам илышыш пуртен толмо пагыт – дене кылдалтын.
Шарнеда, 2019 ийыште Йошкар-Олаште Чавайн бульварым – йолын коштмо ик эн кужу кумдыкым – у семын пужен ыштышт. Тудым олаште илыше-влак йӱклымышт годым «Оласе йырвелым йӧнаным ыштымаш» национальный проект дене келшышын тӱзатышашлан ойырен нальыч. Воскресенский проспект деч Киров урем марте шуйнышо участкым йоча модмо площадкыла да ӱмылан авыртыш йымалне теҥгылыште канен шинчыме верла тураште брусчатке, а моло кумдыкшым асфальт дене леведыч. Тидыже калыклан пеш келшыш. Але тунамак Сеҥымаш паркым «Оласе йырвелым кызытсе жаплан келыштарымаш» муниципал пограмме дене келшышын тӱзатышт. Асфальт леведышым да бордюр кӱым тӱрыс вашталтышт, Герой ден тылыште тыршыше-влакын аллейыштым брусчатке дене леведыч. А ӱмаште да тений республик кӱкшытан кок кугу проект илышыш пурталте – Йошкар-Ола ден Медведево посёлко коклаште Черняков бульвар да Медведево посёлкысо «Ясная Поляна» у микрорайон тураште Сеҥымашын 75-ше идалыкше бульвар ышталтыч. Чыла тиде «Медведевоагродорстройын» пашаже.
Шарнеда, кок-кум ий ончыч Куяр – Солнечный – Роҥго корно могай лакылан ыле? Таклан огыл калыкыште «вик корно пий терысан» маныт. Но вик корно сай гын, кӧ йыр коштеш? Олмыктымо деч вара ты трассе могай тӧр лие. Але Медведево районыштак Изэҥер – Ошладӱр – Упамаш, Советский ден У Торъял районла коклаште Алексеевский – Кугу Кадам – Какшанмучаш автомобиль корнылам налаш. Могай сай лийыч. Нуно чылан «Лӱдыкшыдымӧ чапле корно» нацпроект почеш олмыкталтыч. Чумыр кужытышт 60 утла километр лие. Але Медведево район Шоядӱр да Морко район Курыкӱмбал ялла деке корно могай начар ыле. Тыгак Куяр посёлко деч Корта ял марте олаш кайыме корно локтылалт шуктен ыле. Нунымат ты программе почешак чаплын олмыктышт.
Шарнеда, ончыч ялозанлык объектла деке корным ышташак тыршеныт. Ты пашам лачак тиде акционер обществылан негызым пыштыше ДСПМК шуктен. Да, мо шонеда, тудо кызытат тидын деч кораҥын огыл. Но ынде утларакше «Шойбулакский» племзавод» АО да «Акашевский» сурткайык фабрике» ООО гай кугу агрохолдингла дене кылым кучен шога, нунын заказыштым шукта. Теве кодшо ийын пытартышыжлан У Торъял район Кугу Вӱръял воктене сурткайыкым ашныме у комплекс кумдыкым тӱзатышт. Тушто 80 тӱжем утла кубометр мландым тарватылаш, комплекс деке лишемме да площадке кӧргыштӧ 15 километр утла корным ышташ да асфальым шараш логалын. Адакше тидым у верыште ыштыме.
Чыла тыгай пашам писемдаш да саемдаш, акционер обществын генеральный директоржо Альберт Хатифович Вафинын ойлымыж почеш, 2022 ийыште Лесной посёлко воктене у асфальт-бетон заводым пашаш колтымо полшен. Корным тергыме у лабораторийым ыштыме. Автомобиль ден корно техникым олмыкташ да технический могырым обслуживатлаш Медведево посёлкысо производство базым уэмдыме да кӱлеш оборудованийым шындыме. Транспорт участке пытартыш ийлаште у специализироватлыме технике дене пойдаралтын. Ныл самосвал автомобильым, корно фрезам, асфальтым шарыме установкым, корным пеҥгыдемдыме катокым налме. Предприятийыште 90 наре пашаеҥ ышта. Нунын тыршымышт денак «Медведевоагродорстрой» ОАО пытартыш ийлаште сай лектышыш шуын, шке мутшылан оза да пашажлан мутым кучышо ӱшанле подрядчик улмыжым ончыктен.
Юрий ИСАКОВ
Снимкылаште: Алексеевский – Кугу Кадам – Какшанмучаш корно; Советский посёлко тӱрыштӧ корным тӧрлат; Пӱкшерме – Краснооктябрьский – Кугу Шап корно; механизатор ден водитель-влак – Медведево производство базыште; Лесной посёлкысо асфальт-бетон завод; Йошкар-Оласе Чавайн бульварыште кастене; Медведевыште Сеҥымашын 75-ше идалыкше бульвар чоҥалтеш; чоҥымо деч вара бульварыште.
Фотом предприятий деч налме
