Тӱрлӧ чер ваштареш кучедалаш да таза илыш-йӱлам кучаш кумылаҥдыме мероприятий-влак кышкарыште 22-28 май Эндокринный системын черже-влак деч профилактикым эртарыме арня семын палемдалтеш.
Тазалык аралтыш министерствын тӱҥ эндокринологшо, Республиканский клинический больницын эндокринологический отделенийжым вуйлатыше Людмила Егошинан палемдымыж почеш, эндокринный чер-влак кокла гыч кумдан шарлышылан гипотиреоз шотлалтеш. Тудо тироксин манме гормонын ситыдымыжлан кӧра вияҥеш.
Гипотиреоз дене орланыше пациент-влак вий ситыдымым, аппетит йоммым, писын нойымым, нелытым погымым, кӱпнымым, йӱк оралгымым, чогашыл шӧн шупшмым, коваште кошкымым, ӱп кӱрышталтмым, вӱр ситыдымым, мален темдымым, уш ден тӱткыш лушкымым, начарынрак колаш тӱҥалмым, депрессийыш пурен кайымым, шӱмпералтышын шуэммыжым, «ӱлыл» давленийын иземмыжым, холестеринын шукеммыжым, запорын тургыжландарымыжым, шекшыште кӱ погынымым палемдат.
Гипотиреоз шуэн огыл вес чер шеҥгелан «шылеш», сандене тудым тиреотропный гормонын кугытшым висен рашемдаш кӱлеш. Чер чӱчкыдынжӧ аутоиммунный тиреоидитлан (иммунный системе чумыр куатшым шке клеткыж ваштарешак виктара), щитовидный туш ыштыме операцийлан кӧра вияҥеш.
Гипотиреоз дене чӱчкыдынжӧ 40 ий деч кугурак ийготан да азам ыштыше ӱдырамаш-влак черланат, но тыгай лӱдыкшӧ вӱрыштӧ холестеринын шукеммыже, щитовидный тун черже дене орланыме, вуйыш але шӱйыш лучевой терапийым ыштыме деч вара, литий да кардарон дене эмлалтме, аутоиммунный чер вияҥме, родо-тукым коклаште щитовидке дене кылдалтше чер шарлыме, щитовидный тун шарлымыж годымат кугу.
Палемдыме черым шуко еҥын шонымыж почеш йод негызан препарат дене огыл, а врачын палемдымыж почеш тироксин дене эмлат.
М.ИВАНОВА
Фотом Марий Элын Тазалык аралтыш министерствыж деч налме
