22 сенябрьыште Советский районысо В.Бурлаков лӱмеш Кужмарий тӱвыра пӧртыштӧ Виктор Бурлаковым шарныме лӱмеш гармонист-влаклан район кӱкшытан «Под однорядку» фестиваль-конкурс лиеш.
Лайсола ялын эргыже Виктор Дмитриевич – РСФСР-ын да МАССР-ын калык артистше. Марий сымыктышым вияҥдымашке кугу надырым пыштен. М.Шкетан лӱмеш марий драмтеатрыште 50 утла ий тыршен, шӱдо утла рольым чоҥен. Тӱрлӧ семӱзгарым: гармоньым, скрипкам, шиялтышым – шоктен моштымыжо рольым мастарын почын пуаш полшен.
Мер пашамат кумылын шуктен. Сулен налме канышыш лекмекат, Марий кугыжаныш филармонийын артистшылан ыштен. Тыгак Республикысе шанче-методике рÿдерыште методистлан да режиссёрлан тыршен.
Морко калык театрлан да Советский район Кужмара ялыште драме студийлан полшымыжымат калык сайын шарна.
А.БАЙКОВА
Фотом М.Шкетан лӱмеш театрын сайтше гыч налме
