Шочмо йылмына дене савыкталтше «Марий Эл», «Сурт-пече» газет-влаклан возалтше да редакцийыш квитанцийыштым колтышо-влак коклаште лотерей модылтмашым кажне пелийыште эртарена.
Пӧлекым модын налше-влакын лӱмыштым газетнан кодшо кугарнясе номерыштыже савыктенна ыле. Шочмынак редакцийышкына куаныше кумылан икмыняр лудшына толын ыле. Нунын кокла гыч иктыже – бензопилам модын налше Шернур район Кугу Шокшем ял гыч Альбина Сергеевна Ельмекееван Денис эргыже.
– Мемнан мӧҥгыштӧ «Марий Эл» ден «Сурт-пече» газет-влак моткоч вучымо лудыш улыт. Нуным кажне гана куанен лудына. А тӱҥ приз кокла гыч иктыжым модын налмылан ме моткоч куаненна, – чонжым почо Д.Ельмекеев да аважын кӱэшт колтымо торык ден пареҥге йӧршан когыльо терке ден серышым газетнан тӱҥ редакторжо Светлана Пехметовалан кучыктыш.
М-м-м, йытыран тӱрлымӧушкал ӱй дене шӱрымӧ подкогыльын тутло пушыжо тунамак редакций мучко шарлыш.
– Авам лӱмынак таче эрдене ыштыш, – ешарыш Денис.
Альбина Сергеевнан серышыжым уло кумылын лудын лекна. Йоча годсекак марий газет дене кылым кучышо поро йолташна тыгерак серен: «… Эше школышто тунеммем годымак ача-авам «Марий коммуна» газетлан подпискым ыштеныт. Тудын толмекыже, ачам дене, ик лаштыкым кодыде, тавален-тавален лудынна. Кызытат тугак. «Сурт-пече» газетым шеҥгел лаштыкше гыч лудаш тӱҥалам. Леонид Гимаевын скандвордшылан вашмутым кычалам, тӱрлӧ-тӱрлӧ кочкышым ышташ туныктымыда, тазалык нерген, сад-пакчам кучышо-влаклан пӧлеклалтше лаштыклам йӧратен лудам.
Марий газетым кӱрылтыш деч посна налына. «Марий Элыште» ял илыш нерген, «Сылнымут садвечыште» лаштыкым лудаш, увер-аҥарым эскераш келша.
Эргым кожла пашам ышта, садлан модын налме бензопила тудлан лачеш лиеш…».
Альбина Сергеевна пелашыже Валентин Леонтьевич дене кум икшывым ончен-куштеныт, йол ӱмбаке шогалтеныт.
А.Ельмекеева – пашан ветеранже, 20 ий «Нива» совхозышто бухгалтерлан, 15 ий Шернур пенсионный фондышто тыршен. Кызыт тудо сулен налме канышыште гынат, сурт кӧргыштӧ арулыкым эскера, сад-пакчам кушта да икшыве ден уныка-влакым куанен мӧҥгыштӧ вуча.
Алевтина БАЙКОВА
Авторын фотожо.
