2024 ий – Ешын идалыкше. Тидым шотыш налын, кугарнян, 25 октябрьыште, У Торъял тӱвыра да каныме рӱдерыште «Ава ден ӱдыржӧ» еш шоу-программе эртаралтын.

Тушко ушнышо-влак икымше конкурсышто шкешт нерген каласкаленыт, кокымшышто икте-весыштым кузерак палымыштым рашемденыт. «Ик толкынышто» конкурсышто ава-влак ден ӱдырышт ик стилян образым ончыктеныт. Тыгак нуно кидпашашт дене палдареныт.
Шоу-программым иктешлымеке, Егошинамыт, Савельевамыт, Петуховамыт, Соломинамыт, Липинамыт еш-влак тӱрлӧ номинацийыште палемденыт.
Шоу-программым тӱвыра да каныме рӱдер пелен чумырымо «Чудесенка» вокал ансамбль, «Радуга», «Торъялочки», «Импульс» куштышо коллектив-влак, Э.Н.Сапаев лӱмеш У Торъялысе ДШИ-н хореографий отделенийын 2-шо классыштыже тунемше-влак сылне мурышт да куштымашышт дене сӧрастареныт.
Любовь Камалетдинова

Фотом У Торъял тӱвыра да каныме рӱдерын воткыл сайтше гыч налме