Астраханьыште, тӱнямбал таҥасымаште
7-16 июльышто ралли дене тӱнямбал кӱкшытан «Шелковый путь» таҥасымаш эрта. Маршрутшо – Астрахань-Москва. Трассын кужытшо 4464 километр. Тышеч 2786 километрже скоростнойлан шотлалтеш.
Ты стартыш Йошкар-Ола гыч Александр Максимов лектын.
— Такшым пел ий моткоч неле гонкылаште вием тергенам. Ик тылзе канаш йӧн лие. Чылажат сай, уэш тыгай стартыш лекташ – мыланем куан веле. Эн кугу соперникемлан Александр Гилемовым шотлем. Коктынат ик зачётышто улына. Эше ик квадроцикл механик-шамыч деч посна уло. Тыште ойыртемалтше кеч-кӧ «Дакарыш» але вес вере каен кертеш, — палемден спортсмен А.Максимов.
Ушештарена, Российын командыштыже Марий Эл гыч «Чыр Мари» команде дене Александр Максимов квадроцикл дене таҥасымаште ик гана веле огыл вийжым терген, Российын чапшым арален да сай результатым ончыктен. Александр 2018 ийыште кросс-кантри дене тӱнямбал чемпион, а 2019 ийыште ралли-рейдын эше ик баха йӧнжо дене (корно укеан верлаште кудал эртыме кутыш) тӱнямбал кубокын озаже семын палемдалтын. Тудо — «Шёлковый путь-2021» раллин сеҥышыже. Теният «Дакар-2022» раллин участникше лийын, но 10 январьыште, тӱрлӧ амаллан кӧра (двигатель гыч ӱй йоген, шелшымат тӧрленыт, двигательын картерже пелыгыч шелын) «Чыр Мари» команде «Дакар» таҥасымаш дистанций гыч кораҥын. Такшым вич кече жапыште марий патыр общий зачётышто кум эн тале коклаште каен. Лач француз Александр Жиру ден американец Пабло Копеттилан гына сеҥалтын улмаш.
Тений стартыш 73 участник лектын. Нуно шым категорийыште вийыштым тергат. Мутлан, внедорожник-прототип, грузовик, мотовездеход, мотоцикл, квадроцикл-влак…
Е.Эшкинина.
