«Марий чодра» национальный паркыште тений шуэн вашлиялтше кушкылым – пел тылзан орлаҥган кӱртньышудым – верештыныт.
Тудо кугу огыл. Лӱмжымат кушкылын ойыртемжылан кӧра пуэныт. Лышташ лекме тӱрыштӧ тудо орлаҥге гай коеш да шке лышташыжат пел тылзе гай сынан. Тӱнямбалне ты вид 60 наре уло гын, мемнан элыште – кудыт гына. Шукыжым регионласе «Йошкар книгаш» пуртымо. Марий Элыште пел тылзан орлаҥган, вис-вис лышташан, шуко ужаш гыч шогышо, виригинский кӱртньышудо-влакым кугыжанышын шулдыр йымакыже налме.
– Мыйын пашам ыштыме жапыште ты кушкылым паркыште верештме кумшо случай гына. Тудо Яльчик лесничествыште кушкеш. Ик аланыште ик кушкылым, весыште кумытым да лекташ тӧчышӧ кок изи шытышым мумо. Келшен толдымо игече шогымо годым ты шудо йомеш, кеч вожшо ила. Тений игече шокшо да ночко шоген, сандене тудо ылыж кертын. Ме ты кушкылын кузе иланымыжым эскераш тӱҥалына, – палемден «Марий чодра» национальный паркын шанче пашаеҥже, биологий шанче доктор Татьяна Полянская.
Татьяна Сабанцева.
Снимкыште: Пел тылзан олаҥган кӱртньышудо.
Фотом паркын воткыл лаштыкше гыч налме.
