11 сентябрьыште Йошкар-Оласе тӱвыра да каныме рӱдӧ паркыште Марий Элын Молодёжный политике комитетше ден Йошкар-Ола да Марий епархий Айык улмо кечылан пӧлеклалтше «Живи трезво, Марий Эл!» акцийым эртареныт. Тылеч ончыч православный христианин-влак Христосын Ылыж Кынелмыж лӱмеш черкыште Юмылан кумалме деч вара Изи Какшан эҥер сер мучко ыресым нумалын да Кавасе Ачана деч алкоголизм, наркоманий, игроманий дене орланыше-шамычым паремдаш сӧрвален ошкылыныт.
«Живи трезво, Марий Эл!» акций самырык-влак коклаште таза илыш-йӱлан культуржо ден орвуян шонымашым пеҥгыдемдымашке виктаралтын, вет кушкын толшо тукымым уда койыш деч аралыме тӱҥ йӧн-шамыч кокла гыч иктыжлан профилактике шотлалтеш.
Мероприятийыш тӱҥ шотышто студент ден школьник-влак ушненыт. Иктышт тышке группыге, классге толыныт гын, весышт – йолташышт дене пырля але парк гоч эртен ошкылмышт годым чарнен шогалыныт. Коклаштышт кугурак ийготан ден илалше-шамычат койыныт.
Официальный ужашыште организатор-влак саламлыме мутым ойленыт да самырык-шамычым айык илаш, тазалыкым перегаш, шочмо элым йӧраташ ӱжыныт. Доброволец-влак «Живи трезво, Марий Эл!» флайер-шамычым пуэденыт, алкогольын, наркотикын да тӱрлӧ модышын зиянышт дене палдареныт, айык айдемын йӧнжӧ-влак нерген каласкаленыт. Уна-влак Йошкар-Оласе 7-ше №-ан школын 10-шо классыштыже тунемше инвалид ӱдыр Гордея Полушинан «Герой не моего романа» мурыжым шӱм шулен колыштыныт.
Паркыште таза илыш-йӱлан ямжым почын ончыктышо икмыняр интерактивный площадке, зоно да станций пашам ыштен. Мероприятийыш толшо-влак кажнышкыже рӱжге ушненыт. Поснак Республикысе наркодиспансерын «Яндар билет» площадкыштыже шуко калык лийын. Тыште квест ден викториным эрташ, кызытсе жаплан келшыше алкотестер полшымо дене шӱлалтен лукмо южышто алкогольын концентрацийжым тергаш да призым модылтымашке ушнаш яндар билетым налаш йӧн лийын. А эше профессиональный врач-нарколог кумылан кажне еҥлан консультацийым пуэн.
Россий МВД-ын Марий Элысе наркоконтроль виктемжын «Айык илыш верч йӱклена!» усталык площадкыжат весела йӱк-йӱан дене йоҥгалтын. Тыште мероприятийын участникше-влак кидыштым келшыше чия дене чиялтеныт да «Мый айык илышым ойырен налам» ош куэман экраныш тушкалтеныт, а вара воктекыже шогалын фотографироватлалтыныт, видеом войзеныт. Фото ден видеом айык илыш ден самырык тукымым чапландарен возымо хэштег-влакым кученат ышташ лийын.
– Мый Марий Турек гыч улам, Йошкар-Олашке тунемаш толынам. Спиртан напиткым ом йӱ да йӱаш омат шоно, молан манаш гын тудо тазалыклан кугу зияным ышта. Мый айык илыш-йӱла верч улам, – ужар чиян кидшым нӧлталын фотографироватлалте Артём (снимкыште).
Православный доброволец-влакын площадкышт подростко-шамычлан оҥай модыш-квестым эртарен да приз шотеш календарьым, брошюрым, книгам, моло пӧлекым кучыктен.
«Чоным почын мутланымаш» площадкыште Христосын Ылыж Кынелмыж лӱмеш черкын священникше, Йошкар-Ола епархий пеленысе Айык-влакын обществыштым вуйлатыше иерей Андрей Кочетов пашам ыштен.
Йошкар-Оласе медицине колледжын студентше-влак викториным эртареныт да йодышлан чын вашештыше-шамычлан пӧлек шотеш «ДоброЗОЖ» наклейкым кучыктеныт. Тиде площадке поснак Йошкар-Оласе 11-ше №-ан школышто тунемше-влак Илья ден Ярославлан (снимкыште) келшымыла койо. Нуно тышке уэш-пачаш пӧртыльыч да пеш шуко наклейкым нальыч.
– Йолташем-влаклан пуэдем, – кидкопашкыже иктаж 20 наклейкым куанен пыштыш Илья.
Мутшо почеш, рвезе кудымшо классыште тунемеш, тымарте спиртан напиткым эсогыл подылын ончен огыл.
– Ончыкыжымат огым. Пеш оҥай мероприятий, викторинылаште вуйым пудыратылаш, ӱстембал модыш дене модаш, тӱрлӧ квестым эрташ классге толаш кӱлеш ыле, – чаманенрак мане рвезе.
Чынак, паркыште Самырык-влакын полатышт шуко тӱрлӧ ӱстембал модыш дене модын ончаш йӧным ыштен. Нунын площадкыштышт изижат-кугужат юарленыт – чыланат шке вийыштым да мастарлыкыштым терген ончаш тыршеныт.
«Вкусно и точка» ресторанын площадкыштыже самырык-влак официантын пашажым шуктен онченыт: подносыш заказатлыме кочкышым погеныт. А эше тиде заведений кумылан-влаклан тӱрлӧ пашам темлен, нунын ойыртемышт нерген радамын каласкален. Тунемме деч вара пашам ыштен ончаш шонышо-шамыч ятырын лектыч.
Паркыште «Айык Марий Эл Республик» регионысо мер организаций ден «Аноним алкоголик-влак» сообществынат площадкышт пашам ыштен, но нуно пуста лийыныт. Манмыла, Юмо утарыже нунын деке полышым йодын толмо деч.
Мероприятийым иктешлаш гын, тиде кечын Йошкар-Оласе тӱвыра да каныме рӱдӧ паркыште шкешотан шӱлыш озаланен. Тудо самырык тукымлан айык да таза илыш корным ончыктен, волгыдо ончыкылык нерген шонаш, эллан кӱлешан айдеме лияш кумылым луктын.
Маргарита ИВАНОВА
М.Иванован фотожо/ «Марий Эл» увер агентстве
