ЕШ ДА ИКШЫВЕ

«Айдемын илышыштыже еш – эн тӱҥ»

2024 ийым Российыште Ешын идалыкшылан увертарыме. Марий Элыште тудым 29 январьыште торжественно почыныт. Тидым шотыш налын, таче ме икмыняр еҥлан тыгай йодыш-влакым пуэнна: тендан могай еш йӱлада уло? Тудым кунамсек шуктеда? Могай пайремлан уло еш дене чумыргеда?

Евгений Небогатиков, У Торъял район муниципал образований вуйлатыше:

– Айдемын илышыштыже еш – эн тӱҥ. Лач тушто тудо шкенжым айдеме семынак шижаш тӱҥалеш. Лач ешыште, ача-аван койышыштым ончен, нуным пример шотеш ужын, шке илышыжым чоҥа.

У Торъял районышто Еш идалыкым ме 2 февральыште пайремлын почынна. Тушко тымарте «За любовь и верность» медаль дене палемдалтше еш-влакым ӱжынна.

Мемнан нерген ойлаш гын, кажне ийын шкенан суртышто кумалтышым эртарена – уло ешна дене Ош Кугу Юмылан вуйнам савена. Тиде йӱла тукымыштына шукертсек шукталтеш. Еш кумалтышым кугезе ковам, ковам, вара ачам-авам эртареныт. Ынде мыят шке ешыштем шуктен толам. Кызыт ик суртышто ныл тукым (поколений) илена: авам, мый пелашем дене, шочшына да уныкана-влак.

Ме кажныжын, эсогыл изи уныканат, шочмо кечыжым уло еш дене погынен эртарена. Тунам пелашем лӱмынак коҥгаште мелнам кӱэштеш.

Вес йӱланат уло. Мый кум ий военно-морской флотышто служитленам да июльын пытартыш рушарнянже уло ешна дене чумыргена. Лач тунам Военно-морской флот кече палемдалтеш. Ты кечын чыланат мыйым тиде пайрем дене саламлат. Тудым ме мӧҥгыштӧ палемдена але, погынен, пӱртӱсыш лектына.

Икшывына ден уныкана-влак мемнам, пелашем ден когыньнам, тыгак 1 сентябрь дене, 5 октябрьыште Туныктышын кечыж дене саламлат. Мутат уке, 23 февральым, 8 Мартым палемдена. Моло пайремланат, мутлан, У ийлан, Кугечылан, 1 октябрьлан иквереш чумыргена.

Эше тыгай йӱлам шуктена: кажне ийын 9 Май пайрем кечын уло ешна дене шӱгарлашке каена да сарыште вуйыштым пыштыше, тылыште тыршыше ты тӱня дене чеверласыше родына, палымына-влаклан вуйнам савена.

Кок ий ончыч ешыштына у йӱлам илышыш пуртенна манашат лиеш. Ме, кум тукым: пелашем, мый, эргына да кок уныкана – чыланат марий вургемым чиен, Колумб лудмашке кок ий почела миенна. Тушто икымше ганаже мыйын почеламутемым, ӱмаште чылан пырля ик почеламутым лудынна. Теният каяш шонена. Ты гана мом да кузе лудына – ончалына. Очыни, мыйынымак ойырен налына.

Татьяна Пчелкина, поэтессе:

– Ме, Пчёлкинмыт тукым, тыгай йӱлам шуктена: ача-аван ныл икшывыже кажныже юбилейым веле огыл, а тыглай шочмо кечым палемдаш чылаштым ӱжына. Пырля чумыргена да йоча жапнам, ача-аванам шарналтена, нунын йӧратыме мурыштым мурена. Баяным, гитарым, моло семӱзгарым шоктен моштышышт шоктат да шукыж годым концертыш логалмыла веле чучеш.

Уныкана-шамычын шочмо кечыштымат погынен пайремлена. Теве мемнан Ивановмыт ешыштак лишыл жапыште кажне арнян шочмо кечым палемдаш тӱҥалына. 5 февральыште кугурак Оля ӱдырнан Анна икшывыжын лиеш. 8 февральыште Настя ӱдырна 19 ийым тема. Кокымшо ӱдырнан, Машан, 13 февральыште шочмо кечыжым эртараш ямдылалтына. Иктешлен ойлаш гын, ме еш пайремым моткоч йӧратена. Тыгайым эртараш кӱлеш, вет тудо икте-весе кокласе кылым вияҥда.

Лидия Веткина, тӱрызӧ, Марий Элын калык мастарже:

–  Пелашемын тукымжо ял кумалтышлан иквереш чумырга. Тыгак Илян кечын уло родо-тукым погынен толыт да тоштыеҥ-влакым ушташ шӱгарлашке коштыт. Чыла тидым йӱла семын аклаш лиеш, шонем.

А мемнан ешыште йӱлалан мыйын шочмо кечемым пайремлымым шотлаш лиеш. Ачаштынышкат шочшына-шамыч толаш тыршат. Ӱдырна-влак  иктыже ешыж дене Йошкар-Ола воктене, весыже Казаньыште илат. Но пелашем  телым, декабрьыште, шочын, да эреж годымак тидым ыштен огыт керт. А мыйын кеҥежым, июнь мучаште, сандене шокшо жапыште, саска кӱмӧ пагытыште куанен толыт.

Любовь Камалетдинова

Фотом еш альбом гыч налме

Опубликовать в Одноклассники

Добавить комментарий