Тачысе саманыште самырык-влак шукыжым олашке илаш каяш тыршат. Тушто вияҥаш, сай паша верым муаш йӧн шукырак манын ойлат. Мутат уке, тиде шонымаште чынжат уло, но чылан шочмо кундем гыч каен пытат гын, ялже йӧршын йомеш. Лач тыгаяк шонымашан тачысе унана Наталья ВАСИЛЬЕВА.
Тудо тений апрель гыч Волжский район шочмо Отымбал ялыштыже тӱвыра пӧртыштӧ пашам ышташ тӱҥалын. Тудын дене таче мутнам вашталтена.
– Наталья, тый тӱвыра пашам ыштет. Очыни, илышет ты алан дене эше йоча пагытыштак кылдаш шоненат?
– Йочасадыш коштмем годымак тӱрлӧ усталык конкурслаште мастарлыкемым тергаш тӱҥалынам. Порат кыдалаш школышто тунеммем годымат чыла гаяк конкурсыш, мероприятийыш ушнаш тыршенам. 2020 ийыште И.С.Палантай лӱмеш тӱвыра да сымыктыш колледжыште театр пӧлкам отличий диплом дене тунем пытаренам. Шинчымашым Россий тӱвыран сулло пашаеҥже Олег Геннадьевич Иркабаевын курсыштыжо погенам. Варажым Озаҥ олаште, кастингым эртен, федеральный радиошколыш тунемаш пуренам. 2023 ийыште тудым тунем пытаренам. Тушто радиовӱдышылан мо кӱлешым шуко пален налынам.
– А молан тый моло ятыр ӱдыр-рвезе семын корнет олаш такыртен отыл?
– Шкем пиалан улмемлан шотлем, вет чонемлан келшыше пашам ыштем, воктенем поро йолташем-влак улыт. Нунын дене пырля кеч-могай сомылат воранен толеш. Мый шочмо ялысе тӱвыра пӧртыш уло кумылын пашам ышташ толынам. Мутат уке, ончыч шоналтенам, вет тыгай пашам виктараш манын, шке ӱмбак кугу ответственностьым налман. Но мый шкетын омыл, эн лишыл йолташ ӱдырем Юлия Ямбашева, ешем, пошкудем, поро палымем-влак улыт. Кажныжлан чон гыч лекше кугу таум каласем.
Икмыняр ий ончыч Отымбал тӱвыра пӧртна петырналте. Оралте моткоч шӱлыкын койын шинчен. Тыге Юлия йолташем дене пырля шочмо ялысе тӱвыра пӧртналан у илышым пуаш, угыч «ылыжташ» шонен пыштышна. Когыньнан шонымашна икгаяк, сандене пырля улына, пашанам пырля виктарена. Тунам шоналтенна: «А молан ме ала-кушко тораш, вес кундемыш илаш кайышаш улына? Молан шочмо кундемыштак кодын, шке пашам ворандараш огыл?»
Мыйын шонымаште, кажне айдеме илышыжым шке чоҥа. Олаште самырык тукымлан кушкаш йӧн шукырак уло, но, мыйын шонымаште, ялыштат шке корным муаш лиеш, вет чыланат шочмо кундем гыч каен пытат гын, тудо пустаҥеш. Эн тӱҥжӧ – шке пашам уло кумыл дене, чоным пыштен ышташ. Кумыл уло,тыгак кыртмен пашам ыштет гын, айдеме Оскарымат налын кертеш, чемпионат лиеш. Чылажат – айдемын кидыштыже.
– Шижалтеш, пашатлан чонетым пыштен пижынат. А тӱвыра пӧртыш еҥ-влак кумылын коштышт манын, могай йӧным кучылтат?
– Мылам поснак икшыве-шамыч дене пашам ышташ келша. Нунын чурийыштышт куан тулым ужын, шкеат веселаҥат, умбакыже иктаж-мом оҥайым, ойыртемалтшым ыштыме шуэш. Теве Кугечылан Еш идалыклан пӧлеклалтше мероприятийым эртарышна. Тушко ача-авам, икшывыштым ушымо. Нуно пырля вӱдуа, нулго укшла да модыш гыч кугече вуйшӱдышым ыштеныт. Еш-влак мече дене кышкылтме модыш гоч икте-весе дене палыме лийыныт. А лӱмын ямдылыме фотосессий чылаштлан моткоч келшен, поснак кролик кажныжын кумылжым савырен.
– Йоча-шамыч дене пашам ышташ, тӱвыра мероприятийым эртараш шагал огыл тыршаш кӱлеш. Кушеч тый тидлан вийым налат?
– Яра жапем пайдалын кучылтам. Спорт дене пеҥгыде кылым кучаш тыршем. Кеҥежым куржталаш йӧратем, 15-20 километрым куржталмаште шке вием тергенам. Телым ече дене коштам. Пӱртӱсыш лекташ келша. Мый шуко жап канде каваште пылын ийын кайымыжым, кастене тылзым эскераш йӧратем. Пушеҥгыште мардеж дене лышташын лойгалтмыжым, памаш вӱдын йоген кайымыжым ончымо, кайыкын сылне мурыжым колыштмо годым чонем кана, нойымо мондалтеш.
– Наталья, чоным почын мутланыметлан кугу тау! Тыгаяк кумылзак лийын код. Сомылет вораныже, пашам ышташ кумылет эре лийже.
– Тау!
Лидия ШАБДАРОВА мутланен
Фотом еш альбом гыч налме
