25 майыште Агавайрем кумалтыш почылтын.
Кугече деч вара вич арня эртымеке, тудо толеш. Агавайрем – Кугу Юмын Сандалыкыште да мландымбалне кече, тылзе, шӱдыр-влак вий дене кававомышышто мардеж, пыл, кӱдырчӧ, волгенче вийым луктын, илян-шамычлан шулыкан усталык вийым шогымыжо, манын палемдат онаеҥ-влак.
Кодшо шуматкечын Йошкар-Оласе «Марий кумалтыш» общине Агавайрем кумалтышым эртарен. Рӱдолаштына илыше марий-влак калыкнан волгыдо, улан да пиалан илыш верч пӱртӱс вийлан шке кумалме мутшым йоҥгалтарен, чес пӧлекым пуэныт. Моткоч куандара кажне гана ты кумалтышыш погынышо-влакын марий вургемым чиен толмышт. Тений самырык-шамычат ятырын лийыныт. Кумалтышым общинын тӱҥ онаеҥже Юрий Тушнурцев виктарен шоген. Общинын еҥже-влак кажне шошо да шыже кумалтыш деч ончыч отым эрыктен тӱзатат.
А шочмын Агавайрем кумалтыш У Торъял районысо Танаксола отышто эртен. Тудым республикысе Марий юмыйӱла ушемын тӱҥ онаеҥже Александр Таныгин виктарен. Лач ты кечын Александр Иванович шке шочмо кечыжым палемден. Ынде ятыр ий тудо марий кумалме йӱлам арален да вияҥден толмо пашам ворандара. Тудын тыршыме денак Марий юмыйӱла ушем йол ӱмбаке шогалын. Шке йырже моло онаеҥ-влакым чумырен. Самырык-влакым йӱлалан шӱмаҥдыме пашамат шуен толеш. Вес регионлаште илыше марий-шамычланат кумалме йӱлам ылыжташ да шуяш полшен шога. Пагалыме Александр Иванович, тек Агавайрем юмо умбакыжат усталыкым пуэн шога, уш-акылда яндар, тазалыкда тумо гай пеҥгыде лийышт. Тыге саламленыт тудым Мер Каҥашын еҥже-влак.
Марий юмыйӱла ушемын кагаз пашам шуктышыжо Галина Ласточкинан палемдымыж почеш, Семык да Лышташ кугарня пагытлан шошымсо кумалтыш чарналтеш, молан манаш гын нине пайрем-влак тоштыеҥым уштымо дене кылдалтыныт. Тений Семык 4 июньышто, Лышташ кугарняже 6 июньышто толыт.
Александр Таныгинын ойлымыж почеш, 9 июньышто Мландын шочмо кечыже лиеш, Кугу Агавайремым эртарат. У Торьял кундемыште тудо Эшымсола отышто лиеш. Шернур район гычат толаш сӧреныт. Кугу Агавайрем кеҥежымсе кумалтыш радамым почеш. Тиде кечын мланде пашам огыт ыште. Мландыш вӱран меҥгым, шаньыкым, кольмым кераш огеш темлалт. Ял калык тичмаш мелна кышыл, муно, пура шорва дене Агавайрем юмылан, илян-шамычлан, Ош Сандалык Юмылан вуйым савен кумалеш. Чоткыдо деч чоткыдо пӱтым кучымо пагыт, сандене шкем эскерыман.
Светлана Носова
Снимкылаште: Тумер отышто – Агавайрем кумалтыш годым.
Фотом Ираида Степанован воткыл лаштыкше гыч налме.
