Марий Элын калык артистше Августа Романовам палыдыме еҥже укеат. Тудо М.Шкетан лӱмеш Марий национальный, а вара Марий самырык театрыште, ятыр ий «Марий Эл» ГТРК-ште пашам ыштен, а концерт дене республикнан кажне кундемыштыже лийын. Августа Владимировнам уста артист, тале вӱдышӧ, марий шӱлышан, мыскарам йӧратыше чолга ӱдырамаш семын сайын шинчат.
А кызыт А.Романова кушто? Мом ыштылеш да кузе ила? Тидын нерген калыкыште йодшо-влакат улыт.
Кызыт мемнан йӧратыме артистна, мыскарачына Августа Романова – сулен налме канышыште.
– Илышлан куанен илем, – каласыш тудо, – Радиопередачылам ямдылыме годым паша гыч каем да тӱня мучко кошташ тӱҥалам, манын шонем ыле. Чаманаш логалеш, таче кечылан Испанийыште да Андоррышто веле лияш пиал шыргыжалын. Ковид чыла шонымашем луген пытарен. Тиде черже вашкерак эртыже ыле!
Августа Владимировна ик верыште шинчаш огеш йӧрате. Йот эллашке корно петырналтын гын, Марий кундемнан сылне верлашкыже чӱчкыдынак лектын коштеш.
– Театрыште ыштыме годым чыла районышто лиялтын. Но тунам клуб марте кондат да спектакль-концертым ончыктымо деч вара автобусыш шинчын, мӧҥгӧ кудалынна. Нимогай вершӧрым ужын шуктен огынал, – порын шарналтыш Августа. – Сандене, сулен налме канышыш лекмеке, Марий Элнан чыла мотор верлашкыже миен толаш шонен пыштышым. Саша Акилбаевын «Пешком по республике» проектышкыже ушнышым. Тудын дене пырля Марий Швейцарийыште, Курыкмарий кундемыште, Мӱшыл ерыште, «Марий Чодыра» заповедникыште лийме, тыгак Киров областьысе Чумбылат курыкыш, Шернур кундемысе штольныш, Татарстанысе «Камское Устье» каныме базыш миен коштынам. Чыла вережат пе-еш чот келшен. Тыгай мотор пӱртӱс! Курыкмарий кундемыш кок гана миенам да эше ты кеҥежым каяш шонем!
А.Романова мотор да ӧрыктарыше кундемлам ончен веле огыл коштеш, а ты ойыртем ден сӧраллыкым войзен кодаш тырша. Тидыжым ме интернетысе соцлаштыклаштыже шкеат ужын кертына. Фотом ышташ кумылан улмыжым эргыже шижын шуктен да кодшо шочмо кечыжлан айфоным пӧлеклен.
– Сниматлашат эргым шочмеке тӱҥалынам, йоча жапшым шарналташ фото-влак лийышт шоненам. Мыйын йоча годсо фотокартычкем пеш шагал, – палдарыш пиалан ава. – Эн ондак «мыльнице» манме фотоаппарат ден коштынам, икмыняр жап гыч планшетем лийын, а вара 9-ше классыште тунемше эргым, тылзе наре складыште грузчиклан тыршымекыже, «цифровикым» налын пуэн, а вара – смартфоным, ынде – айфоным.
Тынар ий жапыште Августа Владимировнан пӱртӱс моторлыкым почын ончыктышо фотокартычкыже-влак моткоч шуко погыненыт. Тудын мастарлыкшым профессионал фотограф-влакат кӱкшын аклат да, пашаже-влакым чумырен, выставкым эртараш темлат.
– Пӱртӱсыш лекташ моткоч йӧратем. Тушто мый вийым погем, – чонжым почо А.Романова. – Теве кызытат садыште улам. Теҥгече тольым. Тыште шып, тымык. Шкетын лияш келша, лумым эрыктем, мончаш пурем. Кайыкем-шамычат мыйым чот вученыт. Нунылан лӱмынак кечшудым, коям конденам. Шулдыран йолташем-влакым эскераш моткоч келша. Тыште икмыняр пий уло, нунымат пукшем. Яра жап годым войзен кондымо кином ончем, книгам лудам. А йӱдым каваш ончаш пеш йӧратем. Тыгодым тӱрлӧ шонымаш ушыш толын пура.
Теве тыге илышын моторлыкшым ужын да шижын мошта поро кумылан, мыскара шӱлышан марий артистна Августа Романова.
Алевтина Байкова
