Марий Эл вуйлатыше Александр Евстифеев Всероссийский кугыжаныш телевизионный да радиовещательный компанийын генеральный директоржын алмаштышыже, ВГТРК-ан региональный департамент вуйлатышыже Рифат Сабитов дене вашлийын.
Нуно «Марий Эл» ГТРК телеканалын пашаж шотышто йодыш-влакым каҥашеныт, палдара Марий Эл вуйлатышын мер кыл да увер управленийже.
ВГТРК департамент вуйлатыше Александр Евстифеевым «Марий Эл» ГТРК-ан у директоржо Станислав Маринин дене палымым ыштен. Тудым шогалтыме нерген пунчалым ВГТРК-ан генеральный директоржо Олег Добродеев луктын.
— ВГТРК-ан мемнан филиалжын коллектившылан 2017 ийыште да сайлымаш жапыште сайын пашам ыштымыжлан тау мутым ойленам. Регионышто тыге профессионально да лектыш дене пашам ыштымылан Олег Борисович ден Рифат Абдулвагаповичлан тау, — каласен А.Евстифеев.
— Александр Александрович дене ме икымше гана огыл вашлийына, филиалын пашажым саемдышаш да тудым вияҥдышаш планым каҥашена. Национальный вещаний, тудлан полшаш да вияҥдаш кӱлмӧ шотышто ме икоян лийынна. Марий калыкын тӱвыражым, йылмыжым да йӱлажым арален кодаш тыршена. Ончылно — шуко оҥай проект, ме нуным Марий Эл правительстве дене пырля илышыш пурташ тӱҥалына, — ойлен Рифат Сабитов.
Л.Камалетдинова.
