У Торъял район Крешын Руйысо «Ромашка» йочасадыш икшыве-влакым тиде ял да воктенсе Кугу Руй гыч веле коштыктат. Тудо 15 верлан келыштаралтын, да кызыт тынар ӱдыр-рвезак коштыт. Кок ял гыч чыла йочалан вер ситен манме деч икте кызыт черетым вуча. Кеч, мутлан, Крешын Руй ялымак налаш. Тудо кугу, но икшыве ты илемыште шагал.
Йочасад шагал икшывылан келыштаралтын гынат, кумдыкышкыжо логалмеке, арулыкшо ден сылне пеледыш-влак кумылым савырат. Чыла вереат тугай чаткалык шижалтеш да палдырна – нигушто ик шӱк пырчымат от уж. Мутат уке, тыгак лийшаш, вет икшывым изиж годымак арулыклан туныктыман. Чыла тидыже — тыште пашам ыштыше-влакын тыршымашыштын лектышышт.
Мийымына годым йочасад вуйлатыше Алевтина Алексеевна Ягодарова отпускышто ыле. Ты пашам жаплан Роза Анатольевна Ситникова шуктен. Тудо тыштак воспитательлан ышта. Роза Анатольевнак йочасад нерген каласкалыш да ончыктен коштыктыш. Ойлымыж почеш, могай-гынат вашталтышым пурташ, мо кӱлешым тӧрлаташ, йӧн лийме семын икшыве-шамычлан иктаж-мом уым налашак тыршат. Мутлан, ӱмаште ньога-влаклан модашышт «Эмлымвер» йоча мебельым, тений у одеял ден солыкым налыныт. Модаш да занятийым эртараш йӧнан лийже манын, вуйлатышын пӧлемже ден физкультур залым верышт дене вашталтеныт.
Тыштат нелылык ден рашемдышаш йодыш улыт. Мутлан, леведыш шотышто.
— Тудым ачалаш кӱлеш. Пурымыда годым экшыкше тендан шинчашкат перныш, очыни – изиш волен кайыме гай лийын. Но тӱҥалтыш уло – икмыняр оҥам вашталтыме. Такшым ача-ава-влак, кеч-мом йодат гынат, полшат, — палдарыш Роза Анатольевна.
Кумданрак — «Марий Эл» газетын
2017 ий 17 октябрьыште лекше номерыштыже лудын кертыда.
Любовь Камалетдинова.
М.Скобелевын фотожо.
