ОБРАЗОВАНИЙ СТАТЬИ ШКОЛ ЙОЛГОРНО

Шонанпыл йымач кает – шонымашет шукталтеш

Кужэҥер район Шорсола тӱҥ школын икымше классыштыже тений 7 икшыве тунемаш тӱҥалын. Чылаже ты тунемме верыште 55 ӱдыр-рвезе шинчымашым пога. А пӱтынь районышто икымше гана парт коклаш 148 йоча шинчын.

     Эрдене икшыве-влак ача-авашт дене пырля верысе школыш вашкат. У тунемме ий дене нуным эн ончычак школым вуйлатыше Ирина Чемекова саламлыш.

      – Икымше урокыш, кеҥеж каныш деч вара икымше гана школ йыҥгыр йоҥгалтеш. Йоча-влак кушкыныт, вийым погеныт, туныктышо-шамычат, шонем, пайдалын каненыт. Таче шым йоча илышыштыже у ошкылым ышта. Нуным да молым школышкына пагален ӱжына. Мемнан йоча-влакым уэмдыме класс-влак «вучат». Кугу таум «Марикоммунэнерго»  ООО-н генеральный директоржылан, Марий Эл Кугыжаныш Погынын депутатше Сергей Белоусовлан каласем. Тыгак кугу тау школым олмыкташ полшышо ача-ава-влаклан, – каласыш тудо.

       Сергей Белоусов тыгак чылаштым у тунемме ий тӱналме дене саламлыш да школын кочмывержылан электромясорубкым пӧлеклыш. Ты кечын школышто туныктышо, тунемше-влак лӱмеш шуко поро шомак, тыланымаш-влак йоҥгалтыныт. Районысо да верысе администраций-влакын, «Маяк» агрофирмын (вуйлатышыже – Григорий Иванов), «Единый Россий» партийын первичный организацийжын лӱмышт дене школ вуйлатыше йоча-шамычлан изи сумкам, тунемме арверым пӧлеклыш. Чыла туныктышылан йоча-влак пеледыш аршашым кучыктышт.

       Калыкын тыгай палыже уло: шонанпыл йымач кает – чыла шонымашет шукталтеш. Садлан ты поро йӱла почешак у тунемме ийыште икымше йыҥгырым йоҥгалтараш икымше классыште тунемаш тӱҥалше Юлия Иванова ден тудын икымше туныктышыжо Эльвира Ивановалан ӱшаныме. А йоча-влак тыгодым, ваш-ваш кидым кучен, классыш «шонанпыл» йымач каеныт. Меат Шорсола кундемын тунемшыже-влакын школ илышышт пиалан да волгыдо лиеш манын ӱшанена.

                                                                                                           М.СКОБЕЛЕВ

 

Авторын фотожо.

 

 

Опубликовать в Одноклассники

Добавить комментарий