Тыгай документальный спектакль 15 ноябрьыште М.Шкетан лӱмеш Марий национальный драме театрыште лиеш. Тушто Унчо ял гыч Анастасия Фёдоровна Ласточкинан куштылго огыл илыш-корныжо почылтеш. Документ-влак негызеш шындыме постановкын режиссёржо – Василий ПЕКТЕЕВ.
Неле пӱрымашан ӱдырамаш нерген тудо кузе пален налын да сценыш документальный спектакльым лукташ мо таратен? Нине да моло нерген В.Пектеев дене мутланышна.
– Василий Александрович, Унчо ӱдырамашын илыш-корныжо нерген кушто колында?
– Кум ий ончыч Унчо гыч йолташем Евгений Сергеевич Петров мӱндыр кокаже Анастасия Фёдоровна Ласточкина нерген каласкален. Мутланен шинчыме годым тудын возен кодымо тетрадьше нерген ойлыш, варажым тудымат ончыктыш. Тетрадьыште шочмыж гыч тӱҥалын неле сар пагытысе илышыже нерген кӱчыкын, но моткоч чаткан возен. Лудмо годымак кумыл тодылалтын, логарыш комыля кӱзен, сандене тудым келыштарен, сценыш лукташ шоненак пыштышым.
– 2020 ий – Кугу Отечественный сарыште сеҥымылан 75 ий…
– Туге, тений ты спектакльым сценыш луктын ом шукто гын, намыс лиеш шоненам да кыртмен пашалан пижынна, эсогыл шошым коронавирус шарлымылан кӧра мӧҥгыштӧ шинчаш кӱлмӧ режимыште улмо годымат артист-влак дене видео полшымо дене ямдылалтынна. Спектакльым «И будущим о прошедших память передадим» проект почеш Президент грандын фондшо полшымо дене сценыш лукмо.
(Умбакыже газетыште лудаш темлена)
А.БАЙКОВА
