Кужэҥер район Эҥыжсола ял гыч фермер С.Макаров (снимкыште) ик тӱжем марте гектар кумдыкеш шурным ончен куштышо республикысе ялозанлык предприятий-влак коклаште пырче лектыш шот дене кумшо верыш лектын. Тидлан тудо Ялозанлык да продовольствий министерствын тауштымашыж дене палемдалтын.
Станислав Алексеевич 1995 ий годсек фермер пашам шукта,талук еда сай лектышан пырчым ончен кушта. Марий политехнический институтын (кызыт Юл кундем кугыжаныш технологий университет) выпускникше шочмо «Искра» колхозштыжо инженер-технологлан шым ий ыштен, но чолга рвезын пашам шкевуя ыштымыже, шкем утларак кумдан терген ончаш кумылжо лектын. Тыге шкенжын да родо-тукымжым пай мландыжым налын, арендатор семын тыршен. Варажым фермер озанлыкым почын.
Мланде пашам шукташ тудын келшыше чыла тӱрлӧ техникыже уло. Прычым шийме кок комбайнже, ораван да гуценицан траторжо-влак радам дене шогат. Рационализатор семын нурышто кучылтшаш техникым шке семын келыштара.Теве мландым пушкыдемдыме оҥай агрегатым йӧнештарен. Ик гана кайымаштак икмыняр тӱрлӧ пашам шукта. Тылеч вара мландым лаптырташ да ӱдаш веле кодеш. А вет тӱшка озанлык-влак ик мландымак ӱдаш йӧршым ыштен шуктымеш шым гана марте тошкен кудалыштыт. Кудывечышкыже ончалаш гын, тушто ятыр тӱрлӧ техникым ужаш лиеш. Шкеж манмыла, омыж денат пасум, тушто умен кушкын шогалше шурным ужеш.
Тӱҥ эҥертышыже – Ярослав эргыже. Тудо чыла тӱрлӧ техникым виктарен мошта, ачаж гаяк тыршыше, уым пален налаш кумылан. Тургым годым пасу гыч пырчым шупшыкташ фермер шке ял гычак Р.Лефановым йодеш. Тудыжын ГАЗ-53 автомашинаже уло.
Фермерын озанлыкше кугу. Тошкемыште чапле фермым чоҥен шынден. Ончыч тушто ятыр вуй сӧснам ашнен, но кызыт ынде шкалан веле куча. Моланже, ветслужбо африкан чума шарлен кертме деч шекланен, тыгай тыгыде фермылаште тиде вольыкым ашнымым чарнаш темлен. Кызыт вӱташтыже ушкал, презе, сӧсна, чыве шогат.
Пырчым опташ чапле кок левашым чоҥен. Кажнышкыже шуко шурно пура. Кызыт Макаровын мландыже 160 гектарыш погына. Тений тышечын 153 гектарышкыже шурным ӱден ыле. 60 гектарым шыдаҥ айлен да 93 гектарым — шож. Гектар еда 26 центнер дене пырчым шийын налын. Тиде – республикыште ик тӱжем марте гектарыште шурным ончен куштышо озанлык-влак кокла гыч лектыш шот дене кумшо вер.
— Кызыт пырчым калыклан ужалем, но тений налше-влак шагалемыныт, — каласкала фермер, — вет ялыште вольыкым шагалрак кучаш тӱҥалыныт. А чыве-комбылан пырче шукак ок кӱл. Окса лиеш гын, у ий марте ӱяҥдышым налын кодынем ыле, вет варажым тудо ятырлан шергештеш.
Кодшо ийын чумыржо минеральный ӱяҥдышым латшым тонным кучылтын. Тидыжат сай лектышым налаш полшен. Кызыт Станислав Алексеевич шушаш шошо тургымлан ямдылалтеш, яра жапше годым техникым ачала.
В.СМОЛЕНЦЕВ
