СПОРТ

Адакат — Йӱдвел марафонышто

Кажне ийын Йӱдвел кундемыште, Мурманскыште, кугу спорт пайрем эрта. Таҥасымаште тӱрлӧ профессиян, профессионал-спортсмен, ечым йӧратыше тыглай еҥ вийжым терга.

Теният стартыш ятыр кумылан еҥ лектын. Марафоным, 50 километрым, куржын эрташ шукышт ончылгочак ямдылалтыт. Ты ганат Марий Эл гыч ечызе-влак миеныт, сай результатым ончыктеныт. Мутлан, Параньга район гыч С.Егоров (рвезе ик гана веле огыл тиде ечыгорнышто вийжым терга) кужу кутышышто куд эн тале спортсмен-влак коклаш логалын. Туштыжо тений лач куд еҥлан окса пєлекым кучыктеныт. 

Судья сомылым шукташ республик гыч кажне ийын И.Сотникова коштеш. Провой кундем гыч Инна Геннадьевна тений латкокымшо гана «Йӱдвел пайремыш» миен.

– Судья сомылым шукташ кушко ӱжыт, тушко каяшак тыршем, вет кажне гана у шарнымаш кодеш. Тӱнямбал кӱкшытыштӧ чапланыше спортсмен-влак дене палыме лиям, – манеш Инна Сотникова. – «Йӱдвел пайремыште» спортын моло тӱрлӧ видше денат оҥай таҥасымаш-влак эртаралтыныт, мучашлан кугу пайремым ыштеныт. Еҥ дене палыме лияш келша, сандене тыгай тўшкашке лектам.

Мӱндыр кундемыш судья сомылым шукташ миен толашыже полшышо-влаклан И.Сотникова кугу таум ышта.

Е.Эшкинина.

М.Иванован фотожо.

Опубликовать в Одноклассники

Добавить комментарий