Сокыр-влакын всероссийский обществыштын регионысо пӧлкашт 90 ияш лӱмгечыжым палемден.
Организацийын еҥже-влакым Марий Элым вуйлатыше Александр Евстифеевын лӱмжӧ дене правительстве председательын алмаштышыже Илга Дравниеце саламлен. «Юбилей – тиде обществын чолга еҥже ден ветеранже-шамычлан поро шӱмым йодшо пашам кӱлын ыштымыштлан таушташ амал. 90 ий жапыште Марий региональный пӧлка начар тазалыкан граждан-шамычым чумырышо мер ушем-влак коклаште ик эн пагалыме лийын. Организацийын полшымыж дене участник-влак шкем тунеммаште веле огыл, тыгак усталык, спорт аланлаште тергат да «айдемын йӧнжылан чарак уке» манмым пеҥгыдемдат», – палемден республикым вуйлатыше саламлымашан серышыштыже.
«Региональный пӧлка инвалид-шамычын комплексный реабилитаций системыштым вияҥдыме, интересыштым аралыме шотышто кӱлешан пашам шуктен шога», – ешарен Илга Дравниеце.
Обществым Марий Элын социальный вияҥмаш министрже Ольга Федорован лӱмжӧ дене тудын алмаштышыже Андрей Компаниец саламлен да мер организацийын вуйлатышыже ден еҥже-влаклан палемдыме пашаштышт сеҥымашке шуаш, моло мер ушем, кучем орган дене пеҥгыде кылым ышташ, чолга шонымаш-влакым илышыш пурташ тыланен.
М.ИВАНОВА
