Гороскоп

9-15 августлан гороскоп

Шорык

Тиде арня чонлан келшыше сомылым шукташ, тӱрлӧ вере миен кошташ келшыше лиеш. Романтика шӱлышан кыл куандара. Тыланда пӧлекым кучыктат, сюрпризым ыштат, йӧратыме нерген ойлат, эсогыл иктаж-кушко канаш пырля миен толаш темлат, очыни.

Презе

Те утларак жапым мӧҥгылан да ешлан ойыреда. Иктаж кугу сатум налаш шоненда гын, тидым кугарня марте ышташ келшен толеш. Уке гын вараже ты шотышто умылыдымаш лектын кертеш. Погым эскералтыман – эҥгекым ыштыме лӱдыкшӧ уло.

Йыгыр

Тиде жап тӱрлӧ документым ямдылаш келшыше лиеш. Кӱлеш уверым писын пален налыда. Иктаж-кушко миен толын, йолташ-шамыч дене вашлийын кертыда. Кугарнян да шуматкечын корнышто тӱткылыкым йомдарыман огыл – иктаж-мо уда лийын кертеш.

Рак

Арнян икымше пелыштыже кумылда нӧлталтше лиеш. Тыланда кугурак должностьым темлен кертыт. Арнян кокымшо пелыже окса шотышто куандарыше огеш лий. Сандене шийвундым аныклен кучылтман. Быт техникым ачалаш логалеш, очыни.

Лев

Могай оҥай шонымашда шочеш – мондаш огыл манын, чылажымат возыза, вет ончыкыжым нуным илышыш пурташ йӧн лектын кертеш. Арнян икымше пелыже иктаж-кушко миен толаш келшыше лиеш. Кугарнян але шуматкечын тазалыкдам эскерыза.

Ӱдыр

Тиде арнян шукертсек тургыжландарыше йодыш-влакым рашемдаш темлалтеш. У шинчымашым налаш кумылаҥыда гын, тиде тыланда куштылгын пуалтеш. Арня мучаште шыдешкыме деч шкем кучаш тыршыза, уке гын стресс лийын кертеш.

Виса

Тендам ятыр куанле тат вуча. Йолташда-шамыч дене вашлийын, иктаж-кушко миен толын кертыда. Чонланда келшыше сомылым весе-влак дене пырля шукташ темлалтеш. Лишыл еҥда-влак нунылан тӱткышым шагал ойырымылан ӧпкелалтыт, очыни.

Скорпион

Те шонымашкыда шуыда да тидын дене коллективыште эшеат кугу пагалымашым суледа. Арнян кокымшо пелыштыже у еҥ-влак дене палыме лияш огеш темлалт. Нуно лӱмнердам волтен кертыт. Сандене весе-шамыч дене мутланыме годым тӱткӧ лийман.

Пикшызе

Тендан иктаж-кушко миен толмыда шуаш тӱҥалеш. Йӧнда уло гын, шонымашдам шуктыза. У шӱмбел дене палыме лийыда. Келшымашда кужун огеш шуйно гынат, ятыр куанле татым пӧлекла. Арнян кокымшо пелыштыже оксам аныклен кучылтман.

Ирказа

Тендан иктаж приключенийым ышташ кумылда лектеш. Спортын экстремальный манме видше келша да тудлан жапым ойыреда гын, адреналиным сайынак налын кертыда. Кугарнян да шуматкечын сусыргымо деч шекланыман.

Вӱд йоктарыше

Тиде жапыште пелашда дене ятыр йодышым куштылгын рашемден кертыда. Кылда сай лийже манын, кеч-мо шотыштат икте-весе дене ласкан мутланаш темлалтеш. Нимогай ӱчашымашке, вурседылмашке, шолып пашашке ида ушно. Тыге тӱрлӧ уда деч утледа.

Кол

Арнян икымше пелыштыже илышда «шолаш» тӱҥалеш. Чыла шукташ манын, жапым арам ида ыште. Каныш кечыла вашеш йолташда-влак дене умылыдымаш лекме лӱдыкшӧ уло. Тидыже нунын дене вашлийын кертдымыда дене кылдалтеш, очыни.

Л.КАМАЛЕТДИНОВА

Опубликовать в Одноклассники

Добавить комментарий