Тачысе кыдалаш профессионал образований системе ончыкылык паша вер дене чак кылдалтын: колледж ден техникум-влаклан ик эн виян предприятий-шамыч, самырык специалистым кычалын, шкак йодмашым колтат.
Марий Эл Образований да науко министерствын увертарымыж почеш, мутлан, кызыт ик «АВТОВАЗ» АО-што гына пашазе профессийла дене 500 утла вакансийым почмо. Тушко выпускник-влак веле огыл, студент-шамычат пашам ышташ пурен кертыт.
Тений 1 сентябрь гыч Россий Федераций Просвещений министерстве «Профессионалитет» эксперимент программым илышыш пурташ тӱналеш. Тудо студент-влаклан шонымо профессийлан кӱчык жапыште тунемаш йӧным ышта. Программе почеш, тыгай курсым кыдалаш профессионал образованийым пуышо организацийлаште тунемше 150 000 студент шинчымашым погаш тӱналеш.
Г.КОЖЕВНИКОВА
