Пытартыш жапыште 31 декабрьым каныш кече семын увертарен кертме нерген утларак да утларак ойлат. Тиде мо дене кылдалтын?
Ю.Часова
Медведево район
Федераций Советын социальный политике шотышто комитетшым вуйлатыше Валерий Рязанскийын мутшо почеш, Кугыжаныш Думын депутатше-влак тиде темлымаш дене келшат гын, сенатор-влакат 31 декабрьым каныш кече семын увертарыме верч лийын кертыт.
Тылеч ончыч Томск областьын губернаторжо Сергей Жвачкин, ӱдырамаш-влакын йодмышт почеш, 31 декабрьыште пашаш лекшаш кечым 28 декабрьыш, шуматкечыш, кусарен. «Ӱдырамаш-влак ӱмбалне у ий пайремлан ямдыдылтме тӱҥ нелыт кия», – пунчалжым умылтарен регионым вуйлатыше. Тудын дене Кугыжаныш Думын еш, ӱдырамаш да йоча йодыш шотышто комитетшым вуйлатыше Тамара Плетневат келшен. Паша, социальный политике да ветеран-влакын пашашт шотышто комитетым вуйлатыше Ярослав Нилов идалыкын пытартыш кечынже пайрем ден каныш кече-влакын чотыштым тичмашнек арален коденат канаш лиеш манын.
Тиде положений гыч лекташ лиеш, палемден Рязанский. Но Россий правительстве законодатель-влакын темлымышт дене огеш келше гын, регион тиде йодыш шотышто шке пунчалжым луктын кертеш, ешарен тудо.
М.ИВАНОВА
