Гороскоп

3-9 майлан гороскоп

Шорык

Тиде арнян парышым шотлаш, иктешлымашым ышташ келшыше жап. Пашаште вуйлатышыда тыршымыдам кӱлеш семын акла. Лӱмнерда утыр кушкеш. Личный илышдам шотыш кондаш йӧн лиеш. Южо паша кыл романтике сынаныш куснен кертеш.

Презе

Теат лач тиде жапыште чондам куандарыше да ончыкыжым кужун шуйнышо кылым ыштен кертыда. Ӱдыр, ӱдырамаш-влак рвезе, пӧръеҥ-шамычлан кызыт поснак чот келшаш тӱҥалыт. Нуныжо шкеныштым чын пӧръеҥ семынак ончыкташ тыршат.

Йыгыр

Ты арнян чонда пуйто «почылтеш»: кумылда нӧлталтше лиеш, вий-куатдат ташла. Тидым весе-влак шекланыде огыт код. Пашалан утларак жапым ойыреда гын, оксада ешаралтеш. Тендан деке уна-влак толыт але шке унала каеда. Чонланда келшыше еҥлан кугурак тӱткышым ойырыман.

Рак

Тыланда ача-авада але кугурак ийготан еҥ-влак полшат. Нунын ой-каҥашышт поснак кӱлешан лиеш. Пашалан тӱткышым утларак ойырыман. Ондак тӱҥалме ала-могай сомылым мучашлаш темлалтеш. Документ-влакым шотыш кондыман.

Лев

Те личный илышыштат, пашаштат кугу кӱкшытыш шуыда. Тӱҥ вийда – мут, сандене тудым шонен да пайдалын кучылташ тыршыза. Тидыже поснак переговорым эртарыме годым палдырна. Тунам кеч-могай йодышым рашемдаш куштылгырак лиеш.

Ӱдыр

Тиде арнян ала-мом тугайым ышташ перна, мо ончыкылыкдам рашемдаш полша. Кеч-куштат тыматле койыш-шоктышан лияш, шкем шот дене кучаш тыршыза. Чыташ тунемза. Утларак поро чонан лияш темлалтеш. Шкендам кушташ кӱлеш.

Виса

Пашаштат, личный илышыштат сай велыш вашталтыш лийын кертеш. Оҥай вашлиймаш вуча да ойыртемалтше еҥ дене палыме лийыда. Тудо илышышкыда ятыр уым пурта, у шижмашым пӧлекла. Ончыкыжым тиде еҥ ик эн сай йолташышкыда савырна.

Скорпион

Тиде арнян парышда кушкеш. Ты амаллан кӧра кумылда чотак нӧлталтше лиеш. Тыгак вучыдымын ешартыш оксам ыштен налаш йӧн лектын кертеш.

Мом палемденда – чыла шуктеда, шукертсек шонымыдам налыда. Тыге шкан ӱшанда эшеат ешаралтеш.

Пикшызе

Тыланда тиде жапыште чолгалыкым ончыкташ да чулымын пашам ышташ темлалтеш. Шонен пыштымашкыда изин-кугун шуаш тыршаш тӱҥалыда. Тидын годымак мӧҥгыда, ешда нергенат ида мондо. Тушто шуктышаш сомыллан жапым муашда кӱлеш лиеш.

Ирказа

Иктаж-кушко кӱчык командировкыш миен толын кертыда. Шӱдыр-влак ӱшандарат: тудо сайын эрта. Коллективдан темлымашыжым шотыш налза. Но пашалан веле огыл жапым ойырыман, личный илышланат тудым ситараш тыршыман. Йолташда-влак дене вашлийын кертыда.

Вӱд йоктарыше

Тиде арнян мӧҥгылан утыжым шерге огыл иктаж арверым але ӱзгарым налын кертыда. Пашам чот ышташ ида тырше. Утларак жап канаш темлалтеш. Тазалыклан кугурак тӱткышым ойырыман. Нигушко ида вашке. Чылажымат икшырымын ыштыза.

Кол

Арнян икымше кечылаштыже шке вийлан пешыже ӱшанаш огыда тӱҥал гынат, вараже пашадам кӱлеш семын мучашледа. Тендам илышын чыла шӧрыныштыжат моткочак куанле арня вуча. Оксада ешаралтеш. Тудо вучыдымынат толын кертеш. Личный илышдат кумылдам нӧлташ тӱҥалеш.

Л.КАМАЛЕТДИНОВА

 

 

Опубликовать в Одноклассники

Добавить комментарий