Кодшо арнян ече дене Марий Элын чемпионатшын II-шо туржо иктешлалтын. Икымше верыш МРМТ-н командыже лектын. Такшым ты команде 2018 ий марте 24 гана почела чемпион лийын. Ты «шўртым» кок ий ончыч МЦБК (Волжск) команде кўрлын. Тений шкешотан юбилей сеҥымаш.
Марий радиомеханический техникумын сборный командыжым ятыр ий Евгений Рыбаков ямдыла. Тений Морко кундемын патырже, Марий Элын заслуженный тренерже 25 январьыште 65 ияш лӱмгечыжым палемден. Тиде сеҥымаш тудланат – кугу пӧлек.
– Таҥасымаш 10-11 мартыште лийын. Икымше кечын эрыкан йӧн дене 5 километрыш куржмаште ӱдырамаш-влак коклаште Елена Якимова (МРМТ) икымше, Юлия Падыганова (МарГУ) кокымшо, Аида Сарваро (МЦБК) кумшо лийыныт. Пӧръеҥ-шамыч коклаште 10 километрыште Дмитрий Чекулаев (МРМТ), Станислав Егоров (МРМТ), Александр Шимятов (МЦБК) ойыртемалтыныт. Эрлашыжым классик йӧн денат призёр-влакын радамышт тыгайракак лийын. Лач пӧръеҥ-шамыч коклаште кумшо верыш Николай Васильев (МРМТ) лектын.
Команде-влак коклаште
1-ше вер – МРМТ (2640 очко)
2-шо вер – Волжск ола, МСОО (2136 очко)
3-шо вер – МарГУ (1313 очко)
4-ше вер – Строительный техникум (182 очко)
5-ше вер – «Йошкин Лось» (142 очко)
6-шо вер – ПГТУ (60 очко)
Район-влак коклаште
Вер Район Очко
- Медведево район 2206
- Волжск ола 2058
- Морко район 1047
- Курык марий район 807
- Звенигово район 748
- Шернур район 657
– Тений теле пагыт моткоч сай лектышан лийын. Кеч пандемий изиш чаракым ыштен гынат, ӱдыр-рвезе-влак кузе ямдылалтмыштым ончыктеныт. Южышт, верыштак тренировкым эртен, сай результатыш шуыныт гын, икмынярыштлан єрдыж кундемыш сборыш лекташ йєн лийын, – ойла ече дене тренер Евгений Григорьевич. – Мемнан командыште тале спортсмен семын Дмитрий Чекулаев ден Санислав Егоровым палемдыман. Спорт мастерыш кандидат нормативым шуктымышт дене Ирина Соловьёвам, Елена Якимовам, Тигран Арутюняным саламлаш лиеш. Нуно Юл кундем федерал округышто, тыгак Российын первенствыштыжат вийыштым тергеныт, сай результатым ончыктеныт.
Но ече тургым умбакыже шуйна. 18 мартыште Мурманскыш, «Йўдвел пайремыш», каена. Тушто тений Дмитрий Чекулаев, Станислав Егоров да Ирина Соловьёва вийыштым тергаш тӱҥалыт. Старт 24-25 мартыште пуалтеш. Икымше кечын эрыкан йӧн дене ӱдырамаш-влак 10 километрыште, пӧръеҥ-шамыч 15 километрыште вийыштым тергат, а вес кечынже классик йӧн дене 5 ден 10 километрыште таҥасат. 27 мартыште кумылан ечызе-влак 50 километр марафоным эрыкан йӧн дене, 28 мартыште кутышым классике йӧн дене (ӱдырамаш-влак 25 километрым) эртышаш улыт, – ойла Е.Рыбаков.
Участник-влаклан пиалан ечыгорным, сай результатым тыланена.
Е.ЭШКИНИНА
