Модыш гоч туныктеныт
24 мартыште Марий Эл Республикын Рӱдо избирательный комиссийже «Знатоки избирательного права» деловой модышым эртарен.
Тушко Йошкар-Оласе 9 школын кугурак класслаштыже тунемше-влак ушненыт.
Конкурсын комиссийышкыже Марий Элысе ЦИК председатель Ирина Татаринова, ЦИК член Мария Микка, оласе 29-ше номеран школын директоржо Александр Кузнецов, Йошкар-Оласе 1-ше номеран территориальный избирательный комиссийын секретарьже Дмитрий Береснев да Марий Элысе ЦИК-ын пашаеҥже-влак пурталтыныт.
Тиде мероприятийым ямдылымашке Молодежный избирательный комиссийын еҥже-влак Александр Петров ден Мария Максимова ушненыт. А модышым тиде комиссийын председательже Глеб Шабалин вӱден.
Эн ончычак ӱдыр-рвезе-влак шке командышт дене палымым ыштеныт да девизышт дене палдареныт. Тылеч вара блиц-разминке лийын. Тушто команде-влак икте-весыштын ончылгоч ямдылыме йодышыштлан вашештеныт.
Деловой модышын тӱҥ темыже-влак, мутат уке, сайлымашым эртарыме дене кылдалтыныт. Тыгак творческий конкурсышто ӱдыр-рвезе-влаклан тудын дене кылдалтше тематике денак пазлым погаш темленыт.
Ӱдыр-рвезе-влакын погымо баллышт дене келшышын, модышышто икымше верым 1-ше номеран школын «Виктория» командыже сеҥен налын. Кокымшо вер дене 30-шо номеран школын «Знатоки права» командыже лектын. Кумшо вер дене 23-шо номеран школын «Граждане России» командыже палемдалтын. Сеҥыше-влаклан дипломым да шарнымашан пӧлекым кучыктеныт. Молыштлан тиде модышыш ушнымо нерген сертификатым пуэныт.
Л.Камалетдинова.
