*«Оласе йырвелым йӧнаным ыштымаш» федерал проектын тӱҥ задачыже – Российысе ола-влакын сыныштым моторешташ, еҥ-влаклан илашышт йӧнанракым ышташ – тыге элна мучко тӱзландарыме пашалан у шӱкалтышым пуаш. Могай олаште могай кумдыкым тӱзатыме нерген уверым единый платформеш вераҥдыме. 14 ияш деч кугурак кажне еҥым йӱклаш ӱжыт. Кызыт пашаче коллективлаште вашлиймаш-влак эртаралтыт, «Илыме вер да ола кумдык» нацпроектын кӱлешлыкше нерген каҥашат.
*Эреак ушештарен шогена, 26 апрель гыч 30 май марте кажне гражданин лӱмын почмо сайтыште, 12.gorodsreda.ru ссылке дене пурен, онлайн йӱклен кертеш. Йӱклымаш годым лекше йодыш-влакым рашемдаш волонтёр штабым чумырымо. Регистрацийым эртыше волонтёр-влак тиде кечылаште Добро.Университет сайтыште онлай йӧн дене тунеммашым эртат, вара регионлаште да районлаште туныкташ тӱҥалыт. Марий Элыште волонтёр-влакым 22 апрель марте погат. Кумылан-влак https://dobro.ru/event/10053987 ссылке дене регистрацийым эртышаш улыт.
Йӱклымаш нерген шукырак еҥ пален налже манын, Россий Минстрой кумда кампанийым увертарен, иктыже – Всероссийский субботник. Тудо 24 апрельыште лиеш. Тӱрлӧ олаште илыше кажне еҥ, субботникыш лектын, кудывечыжым але уремжым эрыктен кертеш. Пошкудо-шамыч дене пырля чумырген, кушто мом ыштышаш нерген кутыралташ, йӱклымӧ шотышто рашемдаш, тӱзатышаш кумдык-влак нерген каҥашаш пеш сай йӧн.
Л.СЕМЕНОВА
